Sinulat ni Elvira Bongosia
Malapuson ang negosasyon sa kagamhanan ug mga tiggama ug bakuna batok sa Coronavirus disease (Covid) matud pa ni National Task Force (NTF) Against COVID-19 chief implementer ug vaccine czar Kalihim Carlito Galvez.
Sa gipahigayong Laging Handa briefing, niadtong Lunes, Enero 18, 2021, miingon si Galvez nga maayo ang pakigsabot sa kagamhanan ngadto sa mga vaccine makers, apan matud pa dili pa mahimong i-anunsyo kon naaprubahan ang kasabotan tungod kay kinahanglan unang mahipno ang gipahigayon nilang negosasyon.
Pasabot pa sa kalihim, giingong nag-request ang mga vaccine makers nga dili una i-anunsyo ang detalye sa kasabutan hangtod wala pa’y pirmadong ‘term sheet’ tali sa duha ka habig.
Apan giseguro ni Galvez nga positibo ug maayo ang dagan sa gihimo nilang pakig-estorya sa pito ka manufacturer nga gilangkoban sa Pfizer, Novovax, Johnson and Johnsons, Sinovac, Gamaleya, Moderna ug AstraZeneca.
Pagbutyag pa ni Galvez, gipaabot nga mokabat sa 148 milyon nga mga bakuna ang ilang posibleng makuha ug mahimo pang madugangan ug 40 milyong bakuna.
Sa kinatibuk-an, anaa sa kapin 180 milyon ka doses sa bakuna ang gitakdang paliton sa Pilipinas gikan sa nagkalain-laing mga mga tiggama ug bakuna kontra Covid.
Giseguro pa sa vaccine czar nga makasalig ang publiko nga ang Vaccine Cluster ug Vaccine Task Group andam nga paghidangat sa sa mga bakuna, apil na niini ang training sa mga vaccinators ug apil usab ang mobilization sa Armed Forces of the Philippine (AFP), Philippine National Police (PNP) ug sa tanang stakeholders, nga mahimong kaabag sa gobyerno sa pag apod-apod sa mga bakuna.