Sinulat ni Rey Anthony Chiu
Sa labing una nga higayon, gibuksan human sa hamubo nga programa, ang pormal nga pagpangrehistro sa mga Tagbilaranon, ngadto sa Philippine Identification System (PhilSys) Step 2 sa Provincial Roll-out niini, niadtong Pebrero 2, 2021.
Labing una nga magsugod ang Tagbilaran City ug sa sunod nga mga adlaw, mosunod nga magbukas ang mga registration centers sa mga kalungsuran, ang Step 2 Roll-out dugay ra unta nga gisugdan apan nalangan kini tungod sa kalisud sa pagpadala sa mga gamit dinhi dala sa pandemya, saysay ni Jocelyn Sarmiento, supervising statistical specialist sa Philippine Statistics Authority (PSA) Bohol.
Kahinumduman nga unang gihimo sa PSA ang pre-registration alang sa giprayoridad nga mga katawhan ilabi na sa mga kabus ug dyutay lang ang kita nga nagdawat sa hinabang sa kagamhanan.
Kini matud sa PSA, aron kahatagan sila ug kahigayunan nga makabukas ug ilang kaugalingon nga mga accounts sa bangko, kay gipangayo didto ang identification cards.
Tumong usab sa kagamhanan nga wagtangon ang mga anomalya nga naglimin sa pagpanghatag sa mga ayuda sa mga kabus, pinaagi sa paghatag sa hinabang direkta ngadto mismo sa nanginahanglan alang sa mas paspas nga tabang.
Ang City Registration Center makit-an sa buhatan sa City Tourism and Information Center atbang sa Island City Mall ug sa Tagbilaran CIty Satellite Market sa Dao District niining syudad.
Ang nakahuman na sa pre registration hatagan na sa appointments alang sa step 2, ug kini mao ang electronic registration diin gawas nga iberipika ang matuod nga identity sa modawat sa ID, kuhaan usab siya ug hulagway, tamla sa tudlo ug iris scan sa mata alang sa mas tino nga pag-ila.
Andam na ang tanan, matud pa ni Mayflor Robles, Registration Officer ug Supervisor sa (PhilSys) City Registration Center, kinsa nakapahipno sa ilang center diin may tulo ka mga electronic data stations nga dungan nga gilantaw nga maka-alagad sa 4-5 ka tawo nga irehistro matag oras.
Tumong sa PSA Bohol nga makaabut sa 45 ka tawo maalagaran matag adlaw kay gilantaw nila ang 16 mil ngadto sa 32 mil ka Bol-anon ang makahuman sa Step 2 sa dili pa ang Mayo 2021.
“Human sa unang hugna, hayan himoon ang online registration dinhi sa Bohol diin may mga fixed registration centers nga mag-alagad sa mga low income households ug sakop sa banay niini, mga amahan sa banay, persons with disabilities ug mga senior citizens, dugang ni Alcazaren.
Kahinumduman nga diha nay unang proseso nga gihimo ang PSA alang sa PhilSys.
Duha ka proseso ang gihimo sa PSA aron makakuha sa mga datos alang sa ambisyoso nga laraw sa pagparehistro sa mga Pilipino aron hiusahon ang mga identification system.
Una niini ang pre-registration diin ang mga sakop sa PSA misuroy sa mga kabalayan sa mga priority groups: ang mga banay nga ubos ang kinitaan, aron mapauna sila sa pagkuha sa mga ID nga ilang magamit sa pagbukas sa mga accounts sa bangko, aron mas mapasayon ang pagtunol sa mga hinabang sa mga banay nga kabus.
Kahinumduman usab nga human niadtong nahauna nga proseso o sa preregistration, may gipanghatag ang PSA nga appointment slips nga mga mga petsa ug oras kanus-a sila mopakita sa PSA Registration Centers alang sa formal nga pagkuha sa hulagway, fingerprints ug iris scan dungan usab sa pagvalidate sa mga dokumento nga gidala.
Human niini, ang mga datus nga ihungot sa mga computer data banks, kolektahon sa nasudnong buhatan sa PSA aron makapagawas sa unified identification card nga gidamgo.
Subay niini, hangyo sa taga PSA, sa panahon sa pandemya nga gipugngan ang pagduol-duol sa mga katawhan, sa pagtamud sa social distancing, kadto lamang napadalhan sa message sa PSA Central Office una ang mu-anha aron mao’y maalagaran, ug kapugngan ang pagtapok-tapok sa lugar.
Sa laingbahin, didto usab ang LandBank of the Philippines pinaagi ni Manager Dexter Ray Ruiz ipasabut ang sistema nga tanyag sa bangko aron pasayonon ang pagmatuod sa paghatag ug kahigayunan sa mgha kabus nga makapanag-iya ug accounts sa bangko.
Ang LandBank Agent Banking Card, usa ka pasilidad nga mahimong sistema sa pagkuha sa mga kabus sa ilang hinabang gikan sa kagamhanan, ug kini makuha dayun sa mga interesado nga marehistro sa PhilSys. (rahc/PIA-7/Bohol)