Pila ka dapit sa Anda, apil na sa kasuroyan sa mga turista 

Sinulat ni Rey Anthony Chiu

Nahi-apil na ang pipila ka mga lugar sa Anda, Bohol sa mga mahimong kasuroyan sa mga turista human kini ilakip sa Bohol Tourism Bubble niining bag-o lamang.

Hinuon, kadtong mahimo nga suroyan sa mga turista, kadto lamang mga suroyanan ug accommodation establishments nga nakakuha sa Department of Tourism (DOT) accreditation ug naka-angkon sa Ultimate Bohol Experience (UBE) seal.

Mahimo na usab nga ang mga turista nga mopundo sa Bohol sobra sa 5 ka adlaw nga dili magpakita sa negatibo nga resulta sa Reverse transcription Polymerase Chain Reaction (RT-PCR), kini lakip sa pipila ka mga kausaban nga nasukip sa nbag-ong Executive Order No. 7 nga gipagawas sa goberandor dili pa dugay.   

Sa dugang pagpadaku sa bukas nga pultahan sa Bohol alang sa mga turista, giluwatan ni Gob. Arthur Yap ang Executive Order No. 7 nga nag-amendar una nga mga lagda ilabi na sa pagpatuman sa Bohol Tourist Bubble.

Subay niini, ang mga turista nga mopundo dinhi sa Bohol sa kapin sa 5 ka adlaw, mahimo sila nga mopili sa pagpakuha sa ilang Coronavirus disease (Covid) test pinaagi sa RT PCR ilabi na kon gusto nila nga mogawas sa ilang tourism bubble subay sa Executive Order No. 57.

Hinuon, matud sa bag-ong Executive Order, kung dili sila mogawas sa ilang tourist bubble, dili sila pugson sa pagpakita sa negatibo nga Covid test pinaagi sa RT PCR.  

Alang sa mga taga Bohol, mahimo sila nga mo-tipo sa mga meetings, incentives, convetions and exhibitions (MICE) ug events sama sa kasal, hiusa, anniversaries ug susamang pagtapoktapok, basta ang kalihukan adto himoon sa usa  ka lugar nga bukas ug  ang tanang nahilambigit niini magpailawom sa lima ka adlaw nga pagself quarantine human sa kalihukan.

Ug kon sa higayon nga may makita nga mga simtomas sa Covid, o kun uwahi nga masayran nga may nakatambong sa susamang kalihukan nga nagpositibo sa Covid, obligado sila nga magpakuha ug test pinaagi sa RT PCR.

Sa laing bahin, sa mga pagbisita sa mga lugar adtoanan sa mga turista, matud sa bag-ong EO, sama sa nalagda, ang paggawas sa turista gikan sa ilang gisak-an nga katulganan, mahimo lamang kon sila luygan sa tour guide ug tour driver nga accredited sa Department of Tourism, ug kini gipahiluna na nga daan sa DOT accredited Travel ug Tour Operators.

Una na nga gilagda nga ang mga lugar kasuruyan nga nasulod sa tourism bubble, kadto lamang may nakuha nga UBE seal gikan sa lalawigan sa Bohol.

Una pa gyud nga nanghatag ang Bohol sa UBE Seal ngadto sa mga tourism accommodation establishments ug tourism sites, kasayuran nga makit-an sa tourism.bohol.gov.ph.

Dugang sa bag-ong EO, ang mga turista kinahanglang makapakita sa ilang tour vouchers nga may nakalista nga destinasyon o itinerary gikan sa accredited tour operators sa ilang pagsulod sa tanan nga mga tourism sites.

Alang sa mga Bol-anon nga turista nga manuroy, kinahanglan silang makapakita sa ilang local nga Quick Reaction (QR) codes sa ilang pagsulod ug paggawas sa mga lugar suroyanan sulod sa Bohol.