3-M Moderna vaccines nga donasyon sa Amerika, gisugat ni Duterte 

Sinulat ni Elvira Bongosia

Niabot na sa Pilipinas ang 3 milyon ka doses sa Moderna anti Coronavirus disease (Covid) vaccine nga donasyon sa kagamhanan sa Estados Unidos sa Amerika.

Niabot ang mga bakuna sa Villamor Air Base, syudad sa Pasay pasado alas 4:00 sa hapon niadtong Martes, Agosto 3, 2021.

Gisugat mismo ni Presidente Rodrigo Duterte ang pag-abot sa bakuna kauban ang pipila ka opisyal gikan sa National Task Force (NTF) Against COVID-19, Inter-Agency Task Force (IATF), ug Embahada sa Estados Unidos sa Amerika dinhi sa Pilipinas.

Sa mubong mensahe ni Presidente Duterte, iyang gipasalamatan ang Estados Unidos tungod sa pagkamanggihatagon niini sa bakuna batok COVID-19 sa Pilipinas.

“I would like to extend my deepest gratitude to the COVAX Facility for the continuous donation of these vaccines. We look forward to the delivery of even more life-saving vaccines in the country very soon,” (Mapasalamaton ako sa Covax facility sa padayon nga donasyon sa mga bakuna. Nagpaabot kami nga aduna pay dugang nga mga bakuna nga mga salbar ug kinabuhi ang muabot sa dili madugay.), matud pa sa Pangulo.

Matud pa usab niini nga ang mga bakuna nga gi-donate sa Estados Unidos ihatag sa mga kabos nga Pilipino aron mapanalipdan sila batok sa COVID-19.

“Rest assured that everybody will follow that directive, (Akong  ipasalig nga tumanon ang maong direktiba.), pasalig pa ni Duterte.

Ikaduhang shipment na kini sa bakuna gikan sa Amerika ning tuig 2021.

Kahinumdoman nga niadtong buwan sa Hulyo, nakadawat ang Pilipinas ug kapin sa tulo  ka milyong doses sa Johnson & Johnson vaccines gikan usab sa gobyerno sa Estados Unidos.