Sinulat ni Dave Albarado
Ang mga Andahanon gi-palikay ug bisita sa mga lungsod sa Ubay o Dauis. Kun dili makalikay nga mobisita, ang mga magagikan sa maong mga lungsod gi-awhag nga mag self-isolate.
Sa usa ka memorandumnga adunay petsa nga Pebrero 8, 2021, ngadto sa tanang kapitan sa lungsod, gimandu ni Mayor Metodio Amper ngadto sa tanang taga lungsod sa Anda, nga nakasulod sa kalungsuran sa Ubay ug Dauis nga gihango o “encourage” nga mag self-isolate.
Giluwatan ang maong memorandum tungod sa nagpadayon nga mga community transmission sa Corona virus disease (Covid) sa mga kalungsuran sa Ubay ug Dauis.
Gani, ang si bisan kinsa nga nakasulod na niining mga lungsod niining bag-o lamang gihangyo nga mag self-isolate ug dili pug-son nga ilaming o i-quarantine sulod sa 14 ka adlaw.
Gitin-aw sa Municipal Health Office sa Anda nga si Rosario Tinio nga wala gi-dili nga musulod sa Anda ang mga taga Ubay ug Dauis.
Sa wala pa ang kamanduan nga nigawas niadtong Pebrero 8, 2021, adunay nay memorandum gikan ni Amper nga pinetsahan ug Pebrero 5.
Sa kamanduan nga nigawas niadtong Pebrero 5, nakalatid didto nga tanang taga Anda kusganong ge-discourage nga muadto sa mga lungsod sa Dauis ug Ubay. 
Subay niini, ang tanang Andahanon nga muuli gikan sa mga nahisgutang mga lungsod ipailawom sa pugos nga 14 ka adlaw nga quarantine.
Nunot niini, nagpadayag si Dauis mayor Marrieta Sumaylo  ug kasubo tungod sa memorandum ni Amper nga nigawas niadtong Pebrero 5.
Isip reaksyon sa memorandumni Amper, nakahukom si Sumaylo nga mag butang ug checkpoint sa mga entry point sa lungsod aron pug-ngan ang pagsulod sa mga taga-Anda sa Dauis.
Hinoon, nangayo ug pasaylo si Amper ngadto ni Sumaylo. Sayo niini, miluwat ug laing memorandum niadtong Pebrero 8 si Amper ug gitin-aw nga gi-palikay lang ang mga Andahanon ug walay pugos nga quarantine ug ugaling muuli sila gikan sa Dauis o kaha sa Ubay.
Wala na mahinayon ang pagbutang ug checkpoint sa Dauis aron pug-ngan ang mga taga Anda, human nagkasabot ang duha ka mga pangu sa lungsod niadtong Pebrero 9.
Sa laing bahin, kahinumduman nga niining bag-o lamang usab, gipagawas ni Gob Arthur Yap ang Executive Order No 7, series of 2021.
Kini nga executive order nagdugang sa mga lugar sa Bohol nga napailawom sa Tourism Bubble matud pa sa nahaunang mga executive orders gikan sa Kapitolyo.
Gimando didto ang paglakip sa mga pili nga lugar sa Anda nga kasuroyan sa mga turista.
Kini nga mga destinasyon sa Anda naglakip niadtong may nakuha nga Certificate of Authority to Operate gikan sa Department of Tourism (DOT) o sa local government unit sa Anda o kadtong mga resorts nga may nahuptan nga Ultimate Bohol Experience (UBE) seal.