Sinulat ni Elvira Bongosia
Ang Department of Labor and Employment (DOLE) sa Central Visayas (DOLE-7) nakahatag na sa kinatibuk-ang hinabang sa 459 ka informal sector workers sa lalawigan sa Bohol ug P6.2 milyon nga kantidad sa livelihood assistance.
Ang DOLE-7 mitaho nga ang mga hatag nga panginabuhian nakabenipisyo sa daghang asosasyon ug indibidwal sa mga lungsod sa Balilihan ug Buenavista.
Sa lungsod sa Balilihan, 102 ka benepisyaryo ang moapil sa lainlaing mga negosyo sa dili madugay sama sa papaya pickling, paghimo sa sabon ug tableya ug food handling business. Nakadawat na sila ug P1.6 milyon nga tabang pinansyal gikan sa DOLE.
Samtang sa lungsod sa Buenavista, di moubos sa 53 ka residente sa Barangay Nueva Montana ang nahatagan ug P511,000 alang sa ilang rice mill project.
Ang Pundok sa mga Asawa Alang sa Kausaban sa Baluarte nahatagan usab ug P482,000 alang sa ilang farm machineries ug inputs project.
Samtang ang Panghagban Women’s Association sa Purok 3 ug ang Women’s Association sa Bantuan Ipadayon ug Palambuon gitakda usab nga moapil sa egg production human makadawat ug P500,000 matag asosasyon gikan sa DOLE.
Ang Kahugpungan sa mga Kababayen-an sa Putingbato sa Barangay Putingbato ug ang Lapacan Norte Women’s Association usab nakadawat ug P532,300 ug P500,000, alang sa ilang farm machineries ug inputs project.
Ang Catigbian Waterworks and Sanitation Association nahatagan usab ug P1 milyon alang sa ilang native chicken production.
Matud pa ni DOLE-Bohol officer-in-charge Angelie Salgados, ang lokal nga kagamhanan sa Balilihan ug ang accredited co-partners sa DOLE sa implementasyon sa livelihood projects alang sa nahabiling association-beneficiaries nagsugod na sa canvassing sa mga produkto ug materyales nga kinahanglanon sa mga benepesyaryo alang sa pagsugod sa ilang tagsatagsa nga mga kalihokan sa panginabuhian.
Gi-awhag usab ni DOLE-7 regional director Salome Siaton ang mga benepisyaryo sa pagtrabaho pag-ayo ug pag-amuma sa gihatag kanila sa gobyerno.
“I have repeatedly said this every time the department releases livelihood grants to beneficiaries. Take care and nurture your livelihood projects. Make sure that they go a long way. Expand them. More importantly, sustain your undertakings not only for yourselves but also for your respective families,” awhag pa ni Siaton.
Ang livelihood assistance nga gihatag sa mga benepisyaryo gikan sa DOLE Integrated Livelihood and Emergency Employment Program (DILEEP).