Sinulat ni Elvira Bongosia
Gimando ni Presidente Rodrigo Roa Duterte sa Department of Health (DOH) nga i-prayoridad ang pagbayad sa allowances ug uban pang benepisyo nga angay ihatag sa mga health workers.
Kini taliwala sa hulgang halapad nga protesta sa pipila ka grupo sa mga health workers tungod sa nalangay nga pagbayad kanila.
“Itong frontliners, unahin mo na lang, if there is enough money, bayaran mo,” mando ni Presidente Duterte kang DOH Kalihim Francisco Duque III sa iyang Talk to the People, niadtong Agosto 16, 2021.
Base sa taho, may pipila ka grupo sa mga health workers gikan sa government hospitals ug pribadong institusyon ang nagreklamo sa non-release sa ilang Special Risk Allowance (SRA) ug pagtangtang sa ilang benepisyo sama sa meal ug transportation allowance taliwala sa padayon nilang pag-alagad isip frontlines batok sa Coronavirus disease (Covid).
May pipila nga nanghulga usab ug mass leave tungod sa giingong murag wala pagtagad sa gobyerno sa ilang kahimtang.
Una nang gipirmahan ni Duterte ang Administrative Order No. 42 nga maghatag ug P9 bilyon SRA sa mga private ug public health worker nga adunay direct contact sa mga Covid patient.
