BOC mipasidaan sa publiko batok sa pekeng bakuna 

Sinulat ni Elvira Bongosia

Nipasidaan ang Bureau of Customs (BOC) sa publiko batok sa mga locally manufactured fake  vaccines.

Dungan kini sa paghugot sa border security sa ahensya aron mababagan ang importasyon sa mga peke ug smuggled nga tambal ug bakuna.

Kaabag sa BOC ang National Bureau of Investigation (NBI), Philippine Drug Enforcement Agency (PDEA) ug apil usab ang Food and Drug Administration (FDA).

Pahinumdom pa sa ahensya sa publiko, mag-amping gayud sa palitong bakuna.

Kini tungod kay matud pa, posibleng magdala ug dili maayong epekto sa panglawas  ang mga pekeng bakuna tungod kay wala kini nasusi sa mga eksperto.

Dili usab makaseguro nga epektibo ang mga locally manufactured nga bakuna batok sa Coronavirus disease (Covid).

Apan giseguro sa BOC nga padayon silang makig-alayon sa ubang ahensya sa gobyerno pinaagi sa intelligence information sharing, koordinasyon ug enforcement support aron mapugngan ang mga peke ug smuggled nga bakuna.

Kahinumdoman nga sa niaging tuig, nadiskobre ang pipila ka mga makeshifts clinics nga gidudahang gigamit alang sa mga pasyenteng adunay Coronavirus disease (Covid) mao nga posibleng mapaapod-apod ang mga pekeng bakuna.