Sinulat ni Dave Albarado
Ang National Bureau of Investigation (NBI) 7 mipasang-at ug sumbong batok sa duha ka gikatahapan nga adunay giingong kalambingitan sa pagbuhat ug mga pekeng resulta sa reverse transcription-polymerase chain reaction (RT-PCR).
Matud sa mga taho gipasakaan ug sumbong ang usa ka Rogelio Nebres ug usa ka Rakim Busara, kinsa nasakpan niadtong Huwebes, Marso 18, 2021, sa giingongs pagbaligya sa peke nga RT-PCR test result didto sa pantalan sa dakbayan sa Sugbo.
Si Rennan Augustus Oliva, ang regional director sa NBI 7, nagkanayon nga ang kaso nga gipasaka sa Cebu City Prosecutors’ Office naglakip sa estafa.
Dugang pa niya, ang mga kaso lakip usab sa cybercrime human ang mga suspek ninggamit ug computer sa paghimo sa krimen.
Ang NBI 7 niadtong Marso 18, 2021, nihimo ug entrapment operation sa Pier 1, Port of Cebu, human nakadawat og kasayoran gikan ni San Miguel, Bohol Mayor ug kanhi NBI Director Virgilio Mendez sa halapad nga pagpamaligya sa fake RT-PCR test results sa Cebu ports.