Sinulat ni Elvira Bongosia
Magpahigayon ang Department of Education (DepEd) ug early registration alang sa school year (SY) 2021-2022 gikan Marso 26 hangtod Abril 30, 2021.
Human kini sa pipila ka kabag-ohan sa school calendar alang sa SY 2020-2021.
Tuyo niining masiguro nga rehistrado ang mga mosulod nga estudyante alang sa sunod nga school year.
Matud pa sa buhatan nga makatabang usab kini aron mas mapangandaman ang mga posibleng isyu o problema nga ilang atubangon.
“All incoming Kindergarten, Grades 1, 7, and 11 in public elementary and secondary schools shall pre-register to allow the Department to make necessary preparations and incoming plans for the coming school year,” matud pa sa pahayag ni Kalihim Leonor Briones.
Gibutyag sa Kalihim nga i-konsiderar isip pre-registered ang mga estudyante sa Grades 2 hangtod 6, 8 hangtod 10, ug 12 ug tungod niini, giingong dili na kinahanglang mosalmot sa early registration.
Gimando ang early registration sa tanang pampublikong tunghaan sa nasod samtang optional lamang kini sa mga pribadong tunghaan.
Gawas niini, gimando usab sa mga pribadong tunghaan nga ipatuman ang Kindergarten cut-off age ubos sa DepEd Order No. 20, s. 2018.