Sinulat ni Elvira Bongosia
Gatosan ka indibidwal nga gilangkoban sa mga kanhi rebeldeng New People’s Army (NPA) ug pipila ka miyembro sa grupo sa mga mag-uuma ang misalmot sa gipahigayong indignation rally didto sa Munisipyo sa Trinidad niadtong Lunes, Marso 29,2021 diin gipanawagan nila sa NPA nga ihunong na ang ilang pagpangilad. Hulagway gikan sa Katapatan Battalion-47th Infantry Battalion
Ang maong kalihokan gipasiugdahan sa mga kanhi rebelde nga naatol usab sa pagsaulog sa ika 52 nga anibersaryo sa NPA karong tuiga.
Matud pa sa pahayag sa 47th Infantry Battalion sa Philippine Army, gatosan ka indibidwal nga gilangkoban sa mga kanhi rebeldeng NPA ug pipila ka miyembro sa farmer groups ang misalmot sa maong rally nga mikabat og 3 ka oras. Nagsugod kini sa alas 9 sa buntag pinaagi sa motorcade gikan sa barangay Soom paingon sa barangay San Vicente sa lungsod sa Trinidad.
Atul sa gihimong programa, si Antonio Muring, chairman sa League of Filipino Students-Bohol ug kanhi tigpamaba sa Anakbayan nanawagan sa katawhan nga dili suportahan ang rebeldeng kalihokan nga matud pa niya nagsunod sa sayup nga idyolohiya.
“Miundang ko sa kalihukan, kay sa akong pagka armado human mahimong aktibista, wala nako makasabot sa sistema nila. Wala nako makasabot sa programa sa mga komunistang NPA. Ug karon isip usa na ka kanhi rebelde, akong padayonon ang pag awhag sa katawhan nga dili na mosuporta sa walhong grupo,” matud pa ni Muring.
Midugang si Muring sa pag-ingon nga naguba ang iyang kaugmaon apil na ang kaugmaon sa mga batan-on nga iyang gipang-agni nga muapil sa kalihokan sa NPA.
“Miundang ko sa kalihukan, kay sa akong pagka armado human mahimong aktibista, wa nako kasabot sa sistema nila. Wala nako kasabot sa programa sa mga komunistang NPA. Ug karon isip usa na ka kanhi rebelde, akong padayong pag awhag sa katawhan nga dili na mosuporta sa walhong grupo. Ug pagpangusgan namo ang pagpangampanya nga ihunong na aning mga teroristang NPA ang ilang pagpangilad sa katawhan labi na sa mga kabatan-onan. Daghan ng biktima sa ilang walay klaro nga pagtoo. Singkwentay Dos nga pagpanglingla sa katawhan ug paghatag ug kagubot sa atong nasud”, dugang pa ni Muring.
Gipahigayon usab ang pagpasiga sa mga kandila ug pag-ampo nga gihalad sa mga kalag sa tanang biktima sa lima ka dekada nga armadong pakigbisog.
Ang maong rally usa lang sa mga inisyatibo sa mga kanhi rebelde aron pagpakita ug suporta sa gobyerno aron mahunong na ang armadong pakigbisog sa mga komunistang Communist Party of the Philippines-New People’s Army-National Democratic Front (CPP-NPA-NDF).
Ang CPP-NPA gilista isip teroristang organisasyon sa Estados Unidos, European Union, United Kingdom, Australia, Canada, New Zealand, ug sa Pilipinas.