Sinulat ni Elvira Bongosia
Nagpagawas ug listahan sa mga paagi ang Food and Drugs Administration (FDA) aron matumbok kun peke ang usa ka bakuna batok sa coronavirus disease (COVID-19).
Kini human mataho ang mga pekeng COVID-19 vaccine sa nasod sa Mexico.
Matud pa ni Dr. Oscar Gutierrez, deputy director general sa Field Regulatory Operations sa FDA, kinahanglan ang pagsusi sa laboratoryo aron matumbok kong peke ang usa ka bakuna.
Apan matud pa niini nga mahimo usab kining susihon sa publiko pinaagi sa mga mosunod: kun walay label o dili sakto ang label; walay expiration date; walay impormasyon kun unsaon ang paghipos sa produkto; dili maayo ang packaging; dili sakto ang spelling ug grammar sa packaging; hugaw o may daot ang vial; guba ang takob; buslot ang rubber seal; ug adunay foreign materials sa vial.
Pasidaan pa ni Gutierrez, kuyaw ug dili maayo sa panglawas ang paggamit sa dili otorisadong bakuna.
Nipasidaan usab ang World Health Organization (WHO) kalabot sa mga pekeng COVID-19 vaccine.