Sinulat ni Dave Albarado
Ang Court of Appeals (CA) midasun ug mipamatuod sa desisyon sa Securities and Exchange Commission (SEC) diin gibakwi niini ang lisensya o certificate of incorporation sa Kapa-Community Ministry International (KAPA).
Gibakwi sa SEC ang lisensya sa KAPA tungod sa ilang giingong mga pagpangilad sa mga katawhan.
Mipakanaog ang CA ug usa ka 18 ka pahina nga desisyon niadtong Marso 11, 2021 pinaagi sa CA Special 16th Division miingon nga ang SEC adunay eklusibong katungod mahitungod sa petisyon alang sa pagbakwi sa lisensya sa KAPA.
Nunot niini gipamatud-an sa CA nga ang petisyon sa pagbakwi ug legal nga personalidad sa KAPA nasubay sa tukmang proseso ug ang desisyon sa SEC base sa lig-ong kapasikaran ug insaktong ebidensiya.
Ang SEC miluwat sa naasoy nga kamanduan sa pagbakwi sa lisensya niadtong Abril 3, 2019 human nasuta nga ang KAPA nitanyag ug namaligya ug securities ginamit ang usa ka kontrata ug giingon nga kini usa ka donasyon, ngadto sa publiko nga walay pagtugot sa SEC.
Sumala sa Section 6 (i)(2) sa Presidential Decree No. 902-A, ang SEC adunay katungod nga mobakwi sa lisensya sa usa ka gitagaan ug maong lisensya kon adunay nakita nga seryoso nga pagpangilad ug kini makadaot sa interes sa publiko.
Ang pagbakwi sa lisensya nahitabo human mahipno ang imbestigasyon nga gihimo sa SEC nga gilangkoban sa giingong pagpamalogya ug securities nga walay pagtugot.
Walay permiso gikan sa SEC ang KAPA aron mamaligya ug securities ngadto sa publiko nga usa ka kalapasan sa Republic Act No. 8799 kun Securities Regulation Code (SRC).
Gidugang usab sa CA nga ang pagbakwi sa certificate of incorporation sa KAPA sakto ug matarong.
Ang CA misalikway sa pasangil sa KAPA nga gisupak sa SEC ang temporary restraining order (TRO) sa Regional Trial Court sa General Santos City, Branch 35 diin mipagawas ang SEC ug mando sa pagbakwi sa lisensya samtang ang TRO gipatuman.
Ang naasoy nga TRO nga gi-issue niadtong Marso 19, 2019, nagmando sa SEC sa dili pag patuman sa cease and desist order (CDO) batok sa KAPA nga gi-isyu niadtong Pebrero 14, 2019.
Apan matud sa CA, ang pagpagawas ug TRO kulang ug legal nga basehan tungod kay kini nanghilabot sa pagpatuman sa SEC sa iyang gahum ug katungdanan.