Sinulat ni Elvira Bongosia
Nagpagawas ang Department of Education (DepEd) ug mga mando sa mga tinugyanan sa mga tunghaan ug sa mga field offices niini sa pagpahigayon sa sayo nga pagrehistro ug uban pang may kalabotan nga buhaton.
Dungan kini sa paghatag ug bili sa kaluwasan ug panglawas sa mga magtutudlo, mga estudyante ug mga kawani sa departamento.
Sa gipagawas nga memorandum sa DepEd, gipahinumdoman ang mga field office nga gamiton ang mga online nga plataporma ug mga kahon diin ihagbong ang mga papel nga adunay kalambingitan sa pagrehistro sa pagpahigayon sa sayo nga pagrehistro gikan Marso 26 hangtod April 30, 2021.
“Similar to the previous year, early registration forms will be available in barangay halls and other public spaces. An early registration drop-box will be made available for parents or guardians to collect and submit the forms in these identified places,” matud pa sa pahayag ni Undersecretary for Planning and Human Resource and Organizational Development Jesus Mateo.
(Susama sa miaging tuig, ang porma alang sa sayo nga pagparehistro mahimong makuha sa mga barangay hall ug ubang publikong lugar. Usa ka kahon diin mahimong ihagbong ang mga porma diin mahimo didto ihagbong sa mga ginikanan o guardian. Ang mga porma kolektahon sa maong mga nailang lugar.)
Gitugotan lamang ang personal nga sayong pagrehistro sa mga lugar nga gipaubos sa modified general community quarantine (MGCQ) basta masunod ang mga protocols alang sa kaluwasan ug kasanihan.
Samtang gitugutan usab ang Schools Division Superintendent (SDS) nga magpatuman ug sayong pagrehistro nga walay personal nga pakigkita sa mga tinugyanan bisan sa mga lugar nga gipaubos sa MGCQ depende sa kasamtangang pagbana bana sa risgo sa usa ka lugar diin posible ang pagtakboy sa sakit.
Matud pa nga ang mga ginikanan ug guardian lamang ang tugotang muadto sa mga tunghaan.
Giingong angay usab nga magbutang ang mga rehiyonal ug division nga opisina ug mga matawagan nga telepomo alang sa paghatag ug tabang sa mga tunghaan kalabot sa mga polisiya ug uban pa.