Mukabat na duol sa 2 milyones ka mga tawo ang nabakunahan: NVOC 

Sinulat ni Rey Anthony H. Chiu 

Hangtud sa Mayo 1, 2021, adunay kinatibuk-an nga 1.9 milyon na  ka Pinoy nga health care workers, senior citizens, mga tawo na may gihambin nga sakit ug mga frontliners nga anaa sa essential sectors nga naa sa priority masterlis ang nakabaton na sa bakuna.

Niini, 1.6 milyon ka Pinoy nga naa sa frontline health ug medical care services ang nakadawat sa unang tupok sa bakuna, ug lain pa nga 284 mil ang nakahuman na sa ikaduhang tupok.

Kini subay sa taho sa National Vaccine Operations Center (NVOC) kinsa maoy naniid sa pagpadagan sa pagpangbakuna sa nasud.

Sa kinatibuk-an nga ihap, kapin ug dyutay sa usa  ka milyon na ang mga trabahante nga anaa sa frontline health services ang natupokan sa unang dose samtang miabut na sa 270 mil ka frontline health care worker ang nakakompleto na sa ilang ika duha nga dose.

Matud sa mga nalista sa masterlist nga gihuptan sa NVOC sa mga frontline medical workers, may 1.5 milyon ang mahimong makabaton sa bakuna, nga karon 70 porsyento na ang naabut.  

Sa Central Visayas, kapin na sa 131 mil ang mga medical frontline workers nga anaa sa masterlist, ug naabut na sa kagamhanan ang 89 mil alang sa unang tupok ug lain pa nga 32 mil naghulat sa ikaduhang tupok alang sa kompleto nga panalipod.

Sa ikaduha nga priority group, ang senior citizens, miabut na sa 278 mil ka hamtong na ang nakahuman sa unang tupok sa bakuna ug lain pang kapin sa 3 mil ang nakakompleto na sa ikadulang tupok, usa  ka buwan human sila unang mabakunahi.

Sa Priority group A3 o mga tawo nga adunay daan na nga gihambin nga sakit (individuals with comorbidity) sumala sa giprograma, anaa nay 275 mil ang natupokan sa unang dosage samtang mikabat na sa 10 mil ang nakahuman sa ikadunag tupok.

Dinhi sa rehiyon 7, 567 mil ka senior citizens ang gikataho nga anaa sa masterlist apan 126 pa ang nakakuha na sa bakuna, sanglit una na nga gipugngan pa ang pagpangbakuna sa Sinovac sa mga may edad na.

Hinuon, karon, mihatag na ang kagamhanan sa pagtugott alang sa paggamit sa Sinovac alang sa mga may edad na.

Sa priority Group A4 o kadtong mga nagtrabaho sa frontline sa mga batakang serbisyo, gitaho sa NVOC nga aduna nay dul-an sa 2 ka libo na ang nakakuha sa unang dosage.