Sinulat ni Dave Albarado
Masaligon si Transportation Sec. Arthur Tugade nga sa sunod bulan sa Hunyo 2021, ang magdumala sa Bohol Panglao International Airport (BPIA) usa ka pribadong magpapatigayon.
Mao kini ang gipadayag ni Tugade sa iyang pakigpulong sa usa ka online forum nga gipahigayon sa Management Association of the Philippines (MAP) niadtong adlaw nga Martes, Mayo 11, 2021.
Matud pa ni Tugade nga adunay mga teknikal nga mga isyu nga kinahanglan pa nga tukion sa mga panig nga interesado nga maoy magdumala sa BPIA.
Malaumon si Tugade nga mahuman ang mga hisgutanan aron mahipno na ang mga rekisitos nga gitakda sa National Economic Development Authority (NEDA).
Sa panahon nga mouyon ang NEDA sa mga gikasabutan mahimo nga sugdan sa pribadong magpapatigayon ang pagdumala sa na asoy nga tugpahanan nga anaa nahimutang sa lungsod sa Panglao.
Kahinumduman nga niadtong Nob. 2019, gitugutan sa NEDA ang plano nga hatagan ang usa ka pribadong magapatigayon ug operation and management concession nga mulungtad ug 25 ka tuig.Daan na gilaraw sa nasudnong kagamhanan nga ihatag ang pagdumala sa mga tugpahanan sama sa Francisco Bangoy International Airport sa Davao, Ninoy Aquino International Airport ug ang BPIA sa mga pribadong magapatigayon.