ni Fr. Jose “Joesum” Sumampong, Jr.
DOMINGO SANTISSIMA TRINIDAD (B)
Mayo 30, 2021
EBANGHELYO (Juan 3:16-18)
Si Jesus miingon kang Nicodemo, “Kay gihigugma pag-ayo sa Dios ang kalibutan ug tungod niini gihatag niya ang iyang Bugtong Anak, aron ang tanan nga motuo kaniya dili mamatay, kondili makabaton hinoon sa kinabuhing dayon. Kay wala ipadala sa Dios ang iyang Anak nganhi sa kalibutan aron pagsilot kondili aron pagluwas niini.”
“Ang tanan nga motuo sa Anak dili silotan, apan kadtong dili motuo kaniya gisilotan na, kay wala man siya motuo sa Bugtong Anak sa Dios.” Ang Ebanghelyo sa Ginoo.
oOo
Ang Kahulogan Sa Ebanghelyo (Juan 3:16-18)
16a Si Jesus miingon Kang Nicodemo, “Kay gihigugma pag-ayo sa Dios…
Ang tema mao ang gugma. Usa ka gugma nga makapatukmod sa pagbuhat sa mga butang nga lisod masabot. Mao kini ang atong masabot sa pulong nga pag-ayo. Kining gugmaa gilarawan na sa Daang Kasulatan: “Ako ang GINOO, ang Dios nga maluluy-on. Dili ako daling masuko ug hupong sa gugmang walay paglubad ug matinumanon…” (tana-wa sa Exodus 34:4-9).
Ang tibuok nga Bibliya naghisgot mahitungod sa Gugma sa Dios, apan walay nakatugkad kon unsa ang giladmon niini!
“Kay gihigugma pag-ayo sa Dios ang kalibutan…
Sa Ebanghelyo sumala ni San Juan, ang pulong “kalibutan” nga sa Griego “cosmos” nakahulogan sa tibuok uniberso (the entire universe). Kining tibuok uniberso nga Iyang binuhat mao ang gihigugma sa Dios.
Sa ato pa, gihigugma sa Dios ang tanang mga katawhan!
“Kay gihigugma pag-ayo sa Dios ug tungod niini gihatag niya…
Kining “paghatag” adunay dapit ug panahon (space and time). May Kasaysayan kini o tinuod gayod nga kini nahitabo 2,000 na ka tuig ang milabay, sa panahon sa Pagkatawo Sa Ginoo o Ang Pasko!
Anaa usab kini isip kabahin sa atong Credo ug gipamulong kini sumala sa nahitabo: Pagbuhat sa langit ug yuta, pagpanamkon sa Espiritu Santo, pag-anak ni Maria nga Birhen, pagsakit ubos ni Pontio Pilato, paglansang sa Krus, pagkamatay ug paglubong, pagkabanhaw.
Ang atong mga kasaulogan sa liturhiya dili kasaulogan nga nagsukad sa ideya (idea) kondili paghandum sa panghitabo. Ug kining maong mga pangitabo nagahulagway sa dakong gugma sa Dios nga iyang gipadayag pinaagi sa iyang paghatag sa iyang bugtong anak ngari kanato!
Ang Dios mao gayod ang nahigugma!
Unsa may atong tubag niini?
ug tungod niini gihatag niya ang iyang Bugtong Anak…
Sa atong dinalian nga pagbasa niini tingali ato lamang mahinunduman ang Pagkatawo ni Kristo o Inkarnasyon. Apan kon ato gayong aninawon mabasa kanato ang pulong “bugtong”.
Bugtong Anak! Nakapahinumdum nato kang Abraham nga andam mosakripisyo sa iyang bugtong anak (tan-awa sa Genesis 22:2,16).
Mao nga si San Juan mipahipunting sa atong mga hunahuna sa bukid sa Kalbaryo diin didto gikahatag ang labing hingpit nga gasa isip maoy kamatuoran sa dakong gugma.
16b aron ang tanan nga motuo kaniya dili mamatay, kondili makabaton hinoon sa kinabuhing dayon.
Ang Dios mao ang mihimo sa unang lakang. Siya ang unang nahigugma! Ang tanan anaa magasukad Kaniya.
Nasayod usab kita nga diha sa paghigugma dili kini kompleto kon walay tubag. Ang Pagtuo mao ang tubag sa tawo sa gugma sa Dios. Pinaagi niini anaa ang panaghigugmaay sa Dios ug sa tawo.
Ang isyu sa Pagtuo mahinungdanon kay ania niini ang isyu sa kinabuhi ug sa kamatayon. Anaa kanato ang kagawasan sa pagpili: sa kinabuhi nga dayon ba o sa kamatayon nga dayon ba.
Ako, unsa may akong pilion?
17 Kay wala ipadala sa Dios ang iyang Anak nganhi sa kalibutan aron pagsilot kondili aron pagluwas niini.
Kining hunahunaa lahi kay sa gihunahuna sa mga Judio. Gipasabot man god sa mga magtutudlo niadtong panahona nga inig-anhi sa Manunubos Iyang gub-on ang kalibutang makasasala. Bisan gani si San Juan nga Magbubunyag daw mao man kana ang iyang tema (tan-awa sa Mateo 3:10-12).
Ato ba nga buot kondenahon ang mga wala magtuman sa ilang katungdanan, sama niadtong wala moapil sa GSK? Ang atong gugma makaluwas ba?
18 Ang tanan nga motuo sa Anak dili silotan, apan kadtong dili motuo kaniya gisilotan na, kay wala man siya motuo sa Bugtong Anak sa Dios.
Ang pagtuo makaluwas. Anaa ra sa tawo kon siya motuo o dili motuo.
Gipili kini nga maoy Ebanghelyo sa Kasaulogan sa Santissima Trinidad tungod kay ang Santissima Trinidad usa man kay kamatuoran sa gugma (loving reality) diin tungod niini motuo kita pinaagi ni Kristo.
MAINITONG PAGTIMBAYA SA MGA PAROKYA SA LOAY,BOHOL UG MANGA DISTRICT,TAGBILARAN CITY UG SA DIOCESE OF TALIBON (CATHEDRAL) SA ILANG KAPYESTAHAN SULOD NIINING SEMANAHA.