Sinulat ni Elvira Bongosia
Gipangunahan sa Police Regional Office (PRO-7) Amigo Cops ang National Task Force to End Local Armed Conflict’s (NTF-ELCAC) relief operations ug anti-terrorism ug anti-illegal drugs lectures didto sa lungsod sa Inabanga ug Buenavista niadtong Mayo 21 ug Mayo 22, 2021.
Si PRO-7 Regional Director BrIg. Gen. Ronnie Montejo mismo ang personal nga nitunol sa mga livestock ug relief goods ngadto sa 250 ka residente sa Inabanga ug Buenavista kabahin sa pagtagad sa mga lugar nga duol sa kalihokan sa insurhensiya.
Sa iyang mensahe, niingon si Montejo nga ang maong kalihokan nagtinguha sa pagdungan ug pagdala sa mga ahensya sa gobyerno alang sa hingpit nga pagtapos sa problema sa insurhensiya sa nasud.
“Kauban kaninyo atong buhion ug pang hingusgan ang atong kampanya sa NTF-ELCAC. Atong agnihon ang atong mga barangay officials nga himuong aktibo ang atong pagbuntog aning problemaha. Atong tabangan ang atong gobyerno nga magpabilin nga malinawon ang atong lungsod,” matud pa ni Montejo.
Ang matag lungsod nakadawat ug 10 ka buhing kanding ug 5 ka buhing baboy, food packs nga may sulod nga 5 ka kilong bugas, mga dell lata ug noodles, ug health kits nga adunay sulod nga face masks ug face shields.
Matud pa ni Lt. Col. Joseph Berondo, chief sa Bohol Provincial Police Office Police Community Relations (BPPO-PCR) branch, ang PRO-7 ang nagpili sa mga lungsod nga makabenepisyo sa ilang outreach program.
Gidugang usab niini nga ang Buenavista Police Station ug ang lokal nga kagamhanan sa Inabanga nihatag usab sa donasyon drive sa PRO-7.
Sayo ning tuig, ang regional police command nitunol usab ug hinabang sa mga lungsod sa Carmen ug Bilar diin 200 ka mga residente sa maong mga lungsod ang nakabenepisyo.
Tinguha sa maong kalihokan nga magtukod ug lig-on nga relasyon sa komunidad aron mosalmot sila sa hingpit paagi sa pakigbatok sa insurhensiya.
