Sinulat ni Elvira Bongosia
Nanawagan ang Department of Environment and Natural Resources (DENR) sa mga Pilipino nga panalipdan ang kadagatan dungan sa paghisgot sa mahinungdanong papel niini alang sa seguridad sa pagkaon sa gipahigayong pagtuon agi pagsaulog sa Month of the Ocean (MOO) niadtong Mayo 24, 2021.
Matud pa ni DENR Kalihim Roy A. Cimatu, gihatagan niini ug importansya ang paghatag ug proteksyon sa kadagatan dili lamang aron magbaton ug panginabuhian alang sa sektor sa turismo apan alang na usab sa food security sa tibuok nasud.
“During this health crisis, we have already seen how essential food is to our daily lives. It is, therefore, also fitting that we protect our oceans because through the interconnection of biodiversity, our food supply whether inland or water depends on our oceans,” matud pa ni Cimatu.
(Karong adunay krisis sa kasinatian nasayran nato kung unsa ka bililhon ang pagkaon mao kinahanglan panalipdan nato ang kadagatan tungod kay sumpay man ang biodiversity, ang supply sa pagkaon ug katubigan, gasalig sa atong kadagatan.)
Kalabot niini, gipadayag usab ni DENR Undersecretary for Solid Waste Management and Local Government Units Concerns Benny D. Antiporda ang iyang kabalaka tungod kay matud pa makaalarma na ang kahimtang sa atong mga kadagatan.
Matud pa ni Antiporda nga ang nagkadakong problema sa marine pollution mao ang usa sa hinungdan kung nganong gipasarado sa DENR ang tanang ilegal nga nagdumala ug open dumpsites sa tibuok nasod ug ang hugot nga pagpatuman sa Republic Act 9003 o ang Ecological Solid Waste Management Act of 2000.
Una niini, namahayag ang DENR nga ang pagpasarado sa mga open dumpsite kalabot na usab sa gipahigayong Manila Bay rehabilitation nga usa sa prayoridad nga programa sa DENR aron maluwas ang kadagatan sa nasod.
Ang MOO ginasaulog matag tuig sa Pilipinas sa buwan sa Mayo pinasikad na usab sa Presidential Proclamation No. 57 nga gipagawas niadtong tuig 1998.
Ang kasaulogan karong tuig nagdala sa tema nga “The Science We Need for The Ocean We Want.”