Sinulat ni Elvira Bongosia
Gi-aprobahan na ni Presidente Rodrigo Duterte ang paghatag ug hazard pay sa tanang kawani sa gobyerno nga gikinahanglang pisikal nga mag-report sa trabaho samtang gipaubos sa modified enhanced community quarantine (MECQ) period gikan Abril 12 hangtod Mayo 14 o Mayo 31, 2021.
Ang kantidad sa hazard pay nga ihatag dili molabaw sa P500 matag adlaw matag empleyado.
Pinaagi sa Administrative Order 43 nga gipagawas niadtong Hunyo 1, 2021, gi-amyendahan ni Duterte ang Administrative Order (AO) 26 nga naglatid nga kon kinsa ang pede makadawat sa hazard pay.
Ubos sa ECQ, ang mga kinahanglan nga mga biyahe ug operasyon sa mga gikinahanglan nga mga patigayonug services lamang ang gitugotan.
Samtang ubos sa MECQ, gitugotan ang mga kinahanglan nga biyahe ug gimenusan nga operasyon sa mga dili kaayo kinahanglan nga patigayon o mga serbisyo.
Nakalatid sa AO 43 nga ang budget sa hazard pay alang sa mga empleyado sa mga local government unit maggikan sa 2021 pundo sa mga kagamhanang lokal.
Sa laing bahin, ang hazard pay alang sa government-owned and controlled corporations (GOCC) pagapondohan sa operating budget sa matag GOCC alang sa tuig 2021.
Kun ugaling ang mga budget sa LGU o mga GOCC dili kaigo, mahimong kunhuran ang kantidad nga P500 nga maoy ihatag sa mga angayan tagaan ug hazard pay, matud pa sa maong AO.