Sinulat ni Dave Albarado
Giawhag ni Sen. Bong Go ang katawhan nga magpabakuna ug ugaling anaa na ang supply kay magsugod ang pagabot sa mga doses sa bakuna dinhi sa nasud.
Matud pa ni Go nga ayaw usikan ang higayon nga magpabakuna ug anaa na ang bakuna.
Iyang giawhag ang mga essential frontline workers nga naapil sa A4 priority list nga magpalista na aron matupokan ug ugaling muabot na ang supply nga gipaabot nga mahidangat sa nasud katong bulan o sa sunod.
Matud pa ni Go nga walay angay kahadlokan ang mga Pilipino sa bakuna kay kini luwas ug gigarantiyahan sa mga doktor o mga eksperto.
Dugang pa niya ang bakuna maoy yawe o sulbad sa problema nga giatubang sa katilingban nga adunay kalabutan sa Coronavirus disease (Covid).
Iyang gihisgotan ang pamuyo didto sa Amerika diin mahimo na nga makalantaw ang mga tawo ug live nga duwa sa basketball kon ang mga mulantaw kay hingpit na nga nabakunahan.
Dugang pa ni Go nga kun maa daghan ang mga hingpit nga mabakunahan sa nasud, posibleng mas daghang patigayon ang ablihan alang sa publiko.
Nunot niini nga tungod limitado ang gidaghanon sa bakuna, giawhag ni Go nga magpabakuna dayon ang mga Pilipino kun aduna nay higayon.
Mitug-an si Go nga adunay laraw ang kagamhanan nga tagaan ug pahalipay ang mga tawo nga hingpit nga nabakunahan. Usa sa pahalipay ang pagtugot sa mga senior citizens nga hingpit nga gibakunahan nga makagawas sa ilang panimalay ug makalaag hinoon kinahanglan dad-on ang ebidensya nga na tupokan na ug duha ka doses.
Matud pa niya kinahangkan makab-ot nato ang herd immunity diin dili na mukuyanap ang sakit nga Covid.