Sinuat ni Dave Albarado
Malampuson ang pagpahigayon sa Panglao Dive Festival nga gibuksan niadtong adlaw Miyerkules, Hunyo 16, 2021 ug gikatakda nga mahuman karong adlawa, Hunyo 20, 2021.
Ang lima ka adlaw nga kalihokan gihimo isip kabahin sa hinayhinay na nga pagbangon sa ekonomiya ilabi na sa natad sa turismo nga maoy gisaligan ug maayo sa lungsod sa Panglao ug sa lalawigang Bol-anon.
Matod kining tanang kasayuran ni Konsehal Amira Alia M. Caindec, ang chairman sa committee on tourism and cultural heritage sa Sangguniang Bayan sa Panglao ug mao usab ang nangulo sa naasoy nga kalihokan nga gihimo ang festival inabagan sa Department of Tourism.
Pinaagi sa nahisgotang kalihokan malaomon ang mga opisyales sa Panglao sa pagpangulo ni Mayor Leonila Montero nga makatabang kini sila sa hagit karon sa Covid 19 ug mahimon nilang mabalik pagbangon ang kalihokan sa turismo labi na nga duna nay bakuna nga miabot alang sa mga tourism frontliners dinhi sa lalawigan.
Ang mga kalihokan nga gisugdan na ug paghim sa lima ka adlaw nga festival, naglakip sa diving competition, underwater photo contest, coral reef restoration, underwater and coastal cleanup ug uban pang nakahan-ay nga kalihokan.
Gitambongan sa mga opisyal sa gobyerno ang unang adlaw sa festival lakip na si Gob. Arthur Yap ug DOT regional director Shalimar Tamano.
Mihatag usab sa ilang virtual nga mensahe mao sila si Cong. Edgar chatto, Presidential Communications Operations Office Sec. Martin Andanar, Transportation Sec. Arthur Tugade, Sen. Richard Gordon, Sen. Christopher Go ug uban pa.