Sinulat ni Ann Grace C. Rubia (gikan sa Philippine Information Agency)
Gipanghimakak sa Department of Health (DOH) ang pasangil batok kanila nga ang maong buhatan nagpalit ug padulong na mohupas nga mga tambal, ug nga miingon nga supak kini sa bala-od.
Matod pa ni Health Undersecretary Maria Rosario Vergeire sa usa ka online nga tigum, nga dili mahitabo nga mamalit sila sa mga hapit na mahupas nga mga tambal, kay sila nagsunod sa mga patakaran ug bala-od sa kagamhanan.
Kalabot niini, iyang gipahayag nga aduna usab silay protocol ug mga ahensya sa kagamhanan nga naghatag ug bala-od nga dili sila pwede mamalit sa mga padung mahupas nga mga tambal.
Niini, giingon ni Vergeire nga pinasikad sa gisunod nila nga patakaran, mahimo ra sila makapamalit ug tambal nga epektibo gikan sa 18 hangtod 24 ka buwan.
Dugang pa niya, nga aduna usab silay mga patakaran nga gihagatag sa kagamhanan nga kun adunay dinalian nga panginahanglan ang publiko mahimo silang makapalit sa giingon nga tambal, o supply sa tambal nga adunay pagka epektibo nga moabut sa 12 ka bulan.
Sa laing bahin, giingon sa opisyal nga naghulat pa sila sa mga dokumento ug mga dugang pangutana gikan ni Senador Manny Pacquiao, aron mahimo nila nga mahatagan ug solusyon ang maong pasangil.