Sinulat ni Dave Albarado
Gidason pagpasabut ni Presidente Rodrigo Duterte kaniadtong Myerkules, Hulyo 7, 2021 nga libre ra ang mga bakuna sa Coronavirus disease (Covid) nga gihatag sa kagamhanan ug manubag kadtong mamaligya niini.
Sa usa ka taped address nga gisibya pasado sa tungang gabii, niadtong Myerkules, ang Presidente nagpahayag sa iyang mga kabalaka bahin sa makaalarma nga iligal nga pagpamaligya ug mga bakuna.
Tungod niini, gimandoan niya ang mga awtoridad sa pagsusi ug paggukod sa mga tawo nga nagapaluyo niining iligal nga kalihokan.
Matod ni Duterte, makaalarma kaayo kini, samtang iyang gitulisok ang mga nagbuhat niini.
“Dili nato tugutan nga dili masilotan ang mga naghimo niini,” bahad sa presidente.
Dugang pa sa Presidente, gisugo na niya ang mga otoridad nga may kalabutan niini sa pag-imbestiga ug pagpasaka ug kaso sa mga masakpan.
Ang Presidente nag-isyu usab ug direktiba human nakahibalo nga adunay usa ka health worker nga gidakup sa National Bureau of Investigation tungod kay ang akusado iligal nga namaligya ug bakuna nga Sinovac.