Sinulat ni Rey Anthony Chiu
Nagpabilin nga anaa pa gihapon sa 13.67% sa kinatibuk-ang target population upat ka mga nasulod sa priority groups nga bakunahan sa Bohol ang nakakuha na sa kinatibuk-ang panalipod batok sa grabe nga pagkaigo sa coronavirus disease (Covid).
Matud sa taho sa Bohol Inter Agency Task Force (BIATF) niadtong Hulyo 18, 2021, sa kinatibuk-ang 253,146 ka mga health ug medical frontline workers, senior citizens, persons with comorbidities o may daan na nga gibating sakit ug mga gikinahanglang trabahante sa sector sa industriya ug patigayon, 34,620 pa ang nakakuha sa kinatibuk-ang proteksyon batok sa grabe nga Covid human sila hingpit nga gibakunahan.
Sa 34,620 nga nakahuman na sa duha ka bakunahan, 25,947 niini o 74 porsyento ang mga health ug medical care workers nga nagtrabaho sa frontline services nga gihatagag prayoridad sa kagamhanan nga unang mabakunahan sa ka delikado sa ilang mga trabaho.
Sa mga nakakompleto usab sa duha ka tupokan, 19% niini ang gikan sa mga senior citizens ug 5.7% niini ang gikan sa mga aduna nay daan nga gipamati sa lawas.
Sa 25,947 nga mga health care workers nga nakakompleto sa duha ka bakunahan, kini 60% pa lamang sa kinatibu-ang 42,949 nga frontliners nga nahi-lakip sa nalista isip prayoridad nga bakunahan dala sa dakong risgo sa pagtakod diha sa ilang gitrabaho-an.
Sa 147,631 nga nasulod sa masterlist sa mga senior citizens nga una nga bakunahan, 6,686 pa lamang o 4.5% ang adunaykompleto nga panalipod human nabakunahan sa makaduha.
Sa 31,927 ka mga persons with comorbidities nga nasulod sa masterlist, 1,987 pa lamang ang nakakompleto sa duha ka tupokan ug kini 6.22% pa lamang ang natibawas.
Ug gani, sa 30,639 ka mga trabahante sa mahinongdanong sektor sa patigayun, 6,160 pa lamang o 20% ang natupokan sa unang dose sa bakuna.
Hinuon, daan na nga nasayran nga ang pagkahinay sa pagpadagan sa pagpamakuna sa Bohol, kini dala sa hinay nga pagpang-abut-abot sa bakuna sa nasud.
Karong buwana ngadto sa Agosto, matud pa sa mga tinubdan sa nasudnong kagamhanan, nakatigum na ang Pilipinas ug igo nga gidaghanon sa supply sa bakuna nga mo sarang taman sa katapusan sa Agosto.
Sa pagklakaron, matud sa Philippine Statistics Authority, 1.3 milyones na ang populasyon sa lalawigan sa Bohol.
Niini, sumala sa mga eksperto, kon malukop na ug bakuna ang 30% o 390 mil ka tawo, makit-an na nga mugamay na ang ihap sa mga kaso ug dili na mosaka pa ang gidaghanon sa mga mangamatay.
Kon maabut na sa 50% ang mabakunahan, magsugod na ug kunhod ang mga kaso.
Ang 50% sa 1.3 million, anaa na 650 mil ka tawo.
Kon makab-ut na sa usa ka lugar ang pagpangbakuna sa 70% sa iyang populasyon, makab-ot na niini ang herd immunity, dugang sa mga eksperto.
Ang 70% sa 1.3 milyones, 91 mil ka Bol-anon ang kinahanglang mabakunahan.
Sa tag duha ka doses nga kasagaran nga kinaiya sa mga bakuna nga makuha, nanginahanglan pa ang Bohol ug 1.8 million ka doses alang iini.
Kasamtangan nga naa pa sa 145,312 ang kinatibuk-ang doses sa bahuna nga Sinovac, Astrazeneca, Sputnik ug Pfizer ang nadawat sa Bohol, ug dugang niini ang 50 ,000 nga doses sa bakuna nga ginama
sa Johnson & Johnson.