Sinulat ni Elvira Bongosia
Gibutyag sa Department of Health (DOH) nga imposible nga matumbok ang kalainan sa Delta variant sa orihinal nga Coronavirus disease (Covid) strain tungod kay susama lang ang mga sintomas niini.
Matud pa sa labing ulahing abiso sa DOH, ang Delta variant adunay sintomas nga panakit sa ulo, sakit sa totonlan, sip-on, ug hinalat nga parehas sa sintomas sa orihinal nga Covid strain.
Ang giingong kalainan lang sa Delta variant mao nga mas makatakod kini, kaya nga likayan ang immunity protection, ug pagkunhod sa antibody neutralization.
“Viruses naturally undergo mutations as they reproduce. Some mutations might not have significant effects, but other mutations may make the virus more transmissible,” (Natural lang nagmutate ang mga virus sa ilang pagdagan. Adunay mga mutations nga dili dako ang epekto ug aduna pod mga mutation nga makaigon nga mas makatakod ang virus.) matud pa sa abiso sa DOH.
Dugang nga gisulti sa DOH nga ang usa ka kaso sa Delta variant kaya nga makatakod ug walo ka indibidwal.
Tungod niini, subling gipahidomdom sa buhatan ang hugot nga pagsunod sa minimum public health standard sama sa pagsuot ug face mask, pagsunod sa physical distancing, paggamit ug alcohol ug paghugas sa kamot.
Gitambagan usab sa DOH ang publiko nga mag-self-isolate dayon kun nakasinati sa mga sintomas sa Covid ug magpa check-up dayon.
Kun turno na sa pagpabakuna, angay kini sundon ug kumpletohon ang gi-require nga doses.
Sa pagkakaron, nikabat na sa 450 ang kumpirmadong kaso sa Delta variant sa nasod.
