Gikan sa Primer
Mitambong si Gob. Arthur C. Yap niadtong Agosto 12, 2021 sa virtual Ceremonial Distribution sa mga Starter Toolkits sa mga benepisyaryo nga ubos sa Special Training for Employment Program (STEP) nga gilusad sa Technical Education and Skills Development Authority (TESDA), matud sa taho sa Provincial Information and Media Relations (PRIMER).
25 ka mga Shielded Metal Arc Welding NC 1 scholar graduates gikan sa SBR Technical Education Training Center sa Candijay ang nakadawat ug welding kits samtang 25 ka mga Carpentry NC II scholar graduates gikan sa St. Peregrene Institute sa Alicia ang midawat usab sa ilang carpentry toolkits.
Sa iyang mensahe, malipayong nagpasalamat si Yap sa TESDA tungod sa padayon ining pagbansay sa mga kabataan taliwala sa pandemya.
Dugang niya, ang mga kahanas nga nakuha nila gikan sa trainings dili gyud masayang hilabi na nga gapadayon ang pagbakuna sa katawhan diin sensyales nga dili madugay mag-abli na usab ang industriya sa turismo, sektor sa konstruksyon ug sa metal and steel works.
Giawhag usab sa gobernador ang kanunay nga pagtinabangay sa TESDA, Department of Labor and Employment (DOLE), Kagamhanang Probinsyal ug mga lokal nga opisyales para sa pagpadayon sa programa ug paghatag ug mga trabaho.
Matud pa ni Yap sa mga iskolar, gamiton gyud ang ilang mga nahibaw-an ug paga-ampingan ang mga gipanghatag nga toolkits tungod kay dako kini ug tabang para sa pag-palig-on sa ilang kahanas.
Kauban ni Yap sa maong virtual ceremony sila Engr. Winefredo Salas ang Acting Provincial Director, TESDA-Bohol, Virginia Namoc ang Acting Supervising TESDA Specialist, TESDA-Bohol, Capt. Servando Cantaros Managing Director, SBR Technical Education Training Center, Ma. Vilma Yorong, hepe sa Bohol Employment and Placement Office, ug uban pa.
