Sinulat ni Elvira Bongosia
Subling giklaro sa Department of Health (DOH) ang gipakatap na usab nga post nga giingong gikan sa usa ka doctor sa Hong Kong kalabot sa Sinovac.
Sa maong post, gipahinumdoman ang mga netizens sa pag-konsiderar sa guidelines nga gi-set sa Beijing Vaccine Prevention Center sa dili pa magpabakuna samtang gitambagan usab ang mga na-stroke nga dili magpabakuna.
Matud pa sa DOH nga ang Sinovac mahimong ihatag sa mga may edad 18 anyos pataas nga may kontrolado nga comorbidities sama sa chronic respiratory disease, hypertension, cardiovascular disease, chronic kidney disease, cerebrovascular disease, malignancy, diabetes, obesity, chronic liver disease, neurologic disease ug immunodeficiency states.
Alang sa ubang mga sakit sama sa mga may autoimmune disease, HIV, cancer, transplant patients, nagpaubos sa steroid treatment, bedridden nga mga pasyente ug uban pang mga sakit, kinahanglan ug medical clearance sa dili pa magpa-bakuna batok Covid.
Samtang giklaro sa DOH nga mahimong ihatag ang Sinovac sa mga nakadawat ug blood products sama sa convalescent plasma alang sa Covid paghuman sa 90 ka adlaw. Mahimo usab ihatag ang Sinovac sa mga nabakunahan ug flu vaccine ug uban pang mga bakuna human sa 14 ka adlaw.
Subling gipahinumdom sa DOH nga ang mga Covid vaccine luwas, epektibo, ug nahatagan ug Emergency Use Authorization (EUA) sa Food and Drugs Administration (FDA).
Gipahinumdoman sa departamento ang publiko nga kanunay e-beripika ang mga impormasyon nga makita online sa mga lehitimong tinubdan lamang.
