Community Transmission sa coronavirus disease ang natala didto sa lungsod sa Bien Unido ug Talibon, Bohol niadtong adlaw nga Sabado. Agosto 1, 2020.
Kini maoy gibutyag ni Governor Art Yap human ang Department of Health (DOH) region 7 nipahibaw kaniya niadtong Sabado nga adunay duha ka bag-ong kaso nga natala dinhe sa lalawigan sa Bohol.
Matod ni Yap nga ang duha ka individual gikan sa lungsod sa Talibon samtang ang laing usa gikan sa lungsod sa Bien Unido. .
Dugang mitaho si Gob Yap nga ang duha nga positibo sa Covid 19 walay travel history, dili usab kini locally stranded individual (LSI), dili usab Overseas Filipino Worker (OFW) ug dili pa gyud “produkto” sa “contact tracing” maong gi-ila kini nga community transmission na sa coronavirus disease (Covid).
Ang taga Talibon, Bohol gi-admit sa Garcia Memorial Provincial Hospital niadtong Hulyo 27, 2020 ug naka-isolate sukad sa iyang pagka admit hangtod karon dugang ni Yap.
Nahuman na usab ang contact tracing sa mga tawo nga nakaduol sa Covid positive naka “isolate” na usab kini sila.
Samtang, ang taga Bien Unido, Bohol, nanganak kini didto sa Don Emilio Del Valle Memorial Hospital sa Ubay niadtong Hulyo 27, 2020 ug gihilantan kini pagka Hulyo 28, 2020 maong gikuhaan kini ug throat swab samples.
Sumaa ni Yap, ang individual padayon nga naka-isolate karon ug natapos na usab ang gihimong contact tracing sa maong kaso.
Niining, nagkadaghan nga kaso sa community transmission dinhi sa Bohol gipahimangnoan ni Yap ang tanan nga magbantay nga anaa lang sila magpuyo sa ilang balay kon walay lakwon ug disiplina sa kaugalingon ang pagahimoon ubanan sa “minimum health protocols”.
Subli nga gimandoan ni Governor Art Yap ang mga chiefs of police, mga mayor, kapitan ug tanang barangay officials nga striktong ipatuman ang mga protocol ug polisiya niining padayong pagsagobang sa Covid-19 pandemic.