Usa ka wala pa mailheng lalake ang gipatay sa Buenavista ug gidudahang usa ka biktima sa “salvage”.
Ang biktima nagsuot ug itom nga t-shirt ug short pants ug anaa sa 28 anyos ang panuigon, mga 5’6 ang gitas-on, adunay dakong tattoo sa likod nga bahin sa iyang lawas nga napatik ang pangalan nga Samuel Alacida.
Gipatay ang biktima sa wala pa mailheng mga suspects didto sa Sitio Lasang, barangay Panghagban, Buenavista, Bohol.
Ang investigation sa Buenavista PNP nagbutyag nga segun sa mga residente sa maong dapit nga sa may mga alas-11 sa buntag, Agosto 3, 2020, ilang nabati ang dagan sa sakyanan gikan sa Catigbian, Buenavista ug pipila ka minuto ang milabay ug nabati ang buto sa armas diin gidudahang maoy pagpatay sa biktima.
Sa post mortem examination ni Municipal Health Officer Marivic Chua, nadiskobrehan nga kini nakaangkon ug “fatal” nga samad pinusilan sa iyang ulo nga maoy nakaingon sa iyang hinanaling kamatayon.
Nakaangkon sab ang biktima og marka sa pagtuok sa iyang liog ug mga bun-og sa iyang lawas.
Narecober sa crime scene ang usa ka itom nga helmet nga dunay dugo, usa ka pares nga tsinelas ug usa ka itom nga face mask.
Gihimoan na karon ug follow-up investigation sa Buenavista Municipal Police Station ang maong hitabo.