Publiko gipakalma sa DND kalabot sa terror alert sa Japan 

Sinulat ni Elvira Bongosia

Gipakalma sa Department of National Defense (DND) ang publiko kalabot sa terror alert sa Japan tungod kay giberepika pa nila ang nadawat nga hulga gikan sa Japanese Ministry of Foreign Affairs sa Pilipinas ug lima pa ka nasod sa Southeast Asia.

Giseguro sa DND nga kontrolado sa gobyerno ang sitwasyong pangseguridad sa nasod ug hugot kining gibantayan.

Matud pa sa tigpamaba sa DND nga si Arsenio Andolong, gi-rekognisar sa DND ang gipagawas nga Travel Advisory sa Japanese Ministry of Foreign Affairs sa ilang mga kababayan tungod sa impormasyon nga giingong pag-atake sa mga terorista sa Southeast Asia.

“As with all reports concerning the safety and security of our communities, the aforementioned advisory will be subjected to the process of validation,”(Kabahin  sa mga taho  sa safety ug seguridad sa atong mga komunidad  ang maong naasoy nga advisory kinahanglan i-agi pa ug proseso sa pagvalidate.) matud pa sa gipagawas nga pahayag sa DND. 

Matud pa ni Andolong, padayon ang ‘state of heightened alert’ sa DND ug Armed Forces of the Philippines (AFP) sukad pa niadtong Marawi City siege niadtong tuig 2017.

Padayon usab ang ginahimong assessment sa DND, AFP ug sa uban pang ahensya sama sa Anti-Terrorism Council (ATC) sa tanang hulga o impormasyong ilang nadawat gikan sa intelligence community.