Sinulat ni Elvira Bongosia
Gi-aprobahan na ni Presidente Rodrigo Roa Duterte ang pagpahigayon ug praktis sa limitadong face-to-face classes sa mga lugar nga adunay ubos nga kaso ug takdanay sa coronavirus disease (Covid).
Sa gipahigayong press briefing ni Presidential spokesperson Harry Roque ning bag-o lang, gi-anunsyo ni Department of Education (DepEd) Kalihim Leonor Briones ang himuong pagsugod sa face-to-face classes, apan limitado pa lang kini sa 100 ka eskwelahan.
Base sa gipagawas nga sumbanan, ipahigayon lamang ang pilot face-to-face classes kun makapasar sa safety assessment sa DepEd ang lugar diin himuon ang klase.
Giingong kinahanglan usab nga adunay pagtugot gikan sa lokal nga kagamhanan ug kinahanglan ug ‘written consent’ gikan sa mga ginikanan sa mga estudayanteng mosalmot sa face-to-face classes.
Matud pa ni Briones nga himuong limitado ang kapasidad sa mga estudyante alang sa maong set up.
Sa Kindergarten, mga 12 ka learners o estudyante lamang ang mosalmot sa face-to-face classes samtang ang naa sa Grade 1 hangtod Grade 3 kinahanglang naa sa 16 lamang ug ang mga naa sa linya sa technical o vocational learners limitan ngadto sa 20 lamang.
Gipaabot nga sugdan ang pilot testing sa face-to-face classes sa mosunod nga duha ka buwan.
