Sinulat ni Elvira Bongosia
Gilagdaan ni Gob. Arthur Yap niadtong Oktubre 10, 2021 ang Executive Order (EO) No. 49 nga nagmugna sa task force nga motabang sa pagpadali sa pagpasang-at ug kaso batok sa mga nagpaluyo sa “repa” scam sa lalawigan.
Ang maong task force gilangkoban sa mga opisyal gikan sa National Bureau of Investigation (NBI), Criminal and Intelligence Detection Group (CIDG) ug Legal Office sa Kapitolyo sa Bohol.
Gusto ni Yap nga mapasakaan ug kaso ang mga suspetsado sa labing daling panahon aron matabangan ang mga biktima nga makuha ang nahanaw nila nga investments.
Kalabot niini, gibuksan sa Kagamhanang Probinsyal sa Bohol ang usa ka Help Center sa Bohol Wisdom School (BWS) gymnasium sa syudad sa Tagbilaran niadtong Lunes, Oktubre 11, aron ma-asistahan ang mga biktima sa “repa” investment scam sa lalawigan. Gitakupan ang Help Center niadtong adlaw nga Biyernes, Okt. 15, 2021.
Ang maong Help Center gidumala sa Kapitolyo ug Philippine National Police (PNP) – Criminal Investigation and Detection Group (CIDG) nga maoy nangdawat sa mga reklamo ug nitanyag ug libreng legal assistance sa mga biktima.
Giatubang mismo ni Yap ang mga biktima nga nisulong sa BWS gymnasium nga nangayo ug tabang gikan sa kagamhanang probinsyal.
“Kinahanglan maseguro nato ang possibility nga mabalik ang ilang mga tinigum,” matud pa ni Yap.
