Sinulat ni Elvira Bongosia
May maayong resulta ang gipahigayong clinical trial sa lagundi ug tawa-tawa isip tambal sa Coronavirus disease (Covid) diin giingong nakuhaan niini ang sintomas sa mild Covid nga mga kaso, matud pa ni Department of Science and Technology (DOST) Undersecretary Rowena Guevarra.
Matud pa ni Guevarra nga nahuman na ang clinical trial alang sa lagundi, ug ang unang konklusyon mao nga nakakunhod sa sintomas sa mild Covid cases ang maong herbal medicine.
“So, na-prove na nila na nale-lessen yung mga symptom using lagundi, lalo na yung pagkawala ng pang-amoy, nakapagbibigay din ito ng overall relief from discomfort due to the symptoms,” matud pa ni Guevarra.
(Napamatud-an nga mikunhod ang mga sintomas kun gamiton ang lagundi, ilabi na ang pagwagtang sa panimaho, makahatag usab ug alibyo sa dili maayong pamati tungod sa sintomas.)
Samtang nahimong maayo usab ang resulta sa gipahigayong clinical trial sa tawa-tawa.
Gibutyag ni Guevarra nga sa 172 random Covid positive respondents nga niinom ug duha ka tawa-tawa nga 1,950mg capsules ikatulo sa 1 ka adlaw sulod sa 10 ka adlaw, nagingon nga ang ilang sintomas nawala sulod sa 3 hangtod 5 ka adlaw.
Gi-klaro usab niini nga gihatag ang tawa-tawa isip food supplement.
Ang mga sintomas nga nawala sa pag-inom sa tawa-tawa mao ang hilanat, panugnaw, panakit sa kalawasan ug ubo.
Matud pa usab ni Guevarra nga mahimong gamiton ang lagundi ug tawa-tawa sa mga nagself-medicate.
