Sinulat ni Elvira Bongosia
Hugot nga gipahinumdom sa Department of Health (DOH) sa mga local government units (LGUs) nga hugtan ang pagpatuman sa mga health protocols batok sa Coronavirus disease (Covid).
Apil na niini ang paglimita o pagbantay sa mga mass gathering o panagtapok sa mga lungsod.
Kahinumdoman nga ning bag-o lang, nikatap ang mga hulagway sa mga mass gathering o panagtapok ang nakita nga murag wala na nasunod ang social distancing.
Sa usa ka briefing niadtong Lunes, Oktubre 25, 2021, miingon si DOH Undersecretary Maria Rosario Vergeire nga hugot pa gihapong sundon ang maximum nga 50% capacity alang sa mga outdoor parks sama sa mga beach resort, ubos sa Alert Level 3.
Matud pa niini nga makatabang ang pagsunod sa nasabotang safety protocol aron malikayan ang takdanay batok sa Covid mao nga dili mahimong baliwalaon kini.
“I call on the national government agencies: whatever was discussed in the IATF-EID [Inter-Agency Task Force for the Management of Emerging Infectious Diseases], whatever safety protocols that we are now implementing, this is for the good of our population,” panawagan ni Vergeire.
(Nanawagan ako sa mga national government agencies kun unsa ang nasabutan sa IATF-EID [Inter-Agency Task Force for the Management of Emerging Infectious Diseases], kun unsa ang nasabutan nga protocol mao na ang ipatuman alang sa kaayuhan sa tanan.)
Pahinumdom pa sa kalihim nga ang mga ahensya sa gobyerno adunay responsibilidad nga malikayan kining mga panagtapok.
Matud pa ni Vergeire nga kun magpadayon ang mga panagtapok, posibleng mabalik kita sa kaniadtong paghugot sa lihok sa mga tawo.
