Sinulat ni Elvira Bongosia
Gilusad sa Department of Health (DOH) ang bag-ong website nga healthypilipinas.ph, aron mahatagan ug hustong impormasyon sa panglawas ang mga Pilipino sa tibuok kalibotan.
Kaabag sa DOH ang Pharmaceutical and Healthcare Association of the Philippines (PHAP) ug United States Agency for International Development (USAID), sa paglusad sa website pinaagi sa virtual event sa ilang Healthy Pilipinas Facebook page.
Matud pa ni Dr. Beverly Lorraine Ho, concurrent Director IV sa Health Promotion Bureau and Disease Prevention and Control Bureau, kini gimugna aron matabangan ang mga Pilipino nga makakuha ug tukmang impormasyon ilabi na sa panahon nga nikatap ang misinformation sa social media sites .
Ang Healthy Pilipinas nakalinya sa pagkakaron ug sa umaabot nga mga paningkamot sa DOH.
Ang usa ka seksyon nga gi-feature sa website mao ang kampanya sa Seven Healthy Habits nga nagtudlo sa publiko sa naglaian-laing mga lihok ug pamatasang nagpakatap sa kahimsog.
Naka-link usab kini sa Coronavirus disease (Covid) ug ResBakuna campaign pages nga nag-unang website sa DOH alang sa gihiusang pagmensahe ug impormasyon kalabot sa pandemya ug pagpaningkamot sa pagbakuna.
Gamiton usab sa website ang social media aron tugotan ang pagpa-ambit sa mga long-form nga artikulo sa mga gipatuman nang platform sama sa Healthy Pilipinas Facebook page, DOH Twitter account, ug DOH Viber community, gawas sa uban pa.
Labaw pa sa pagtubag sa kahibalo sa kahimsog, gitumbok ni Dr. Ho nga ang website nagtinguha usab nga paganahon ang mga nagsuportang kalikopan alang sa pagduso sa kahimsog. Apil na dinhi ang mga tips, artikulo, ug ma-download nga materyales alang sa mga lokal nga tigpatuman.
Ang Healthy Pilipinas Website usa ka testamento sa dili matay-og nga saad sa DOH nga abton ang mas daghang Pilipino sa tibuok kalibotan ug ipasiugda ang kahimsog ug kaluwasan alang sa tanan.
