Sinulat sa PRIMER
Gipangulohan ni Gob. Art Yap ang regular nga miting kauban ang mga mayor sa nagkalain-laing lungsod, municipal health officers, pribadong sektor ug mga kadagkuan sa Bohol Inter Agency Task Force (BIATF) niadtong Nob. 3, 2021.
Usa sa gihisgotan ang kabahin sa S-Pass kon diin gikonsulta sa gobernador ang mga mayor ug ang pribadong sektor apil na ang medical sector kon angay ba kining ipabilin o tangtangon.
Nahisgotan sa maong miting nga sukad sa paglikbas sa real time-polymerase chain reaction (RT-PCR) test nga rekisito sa pagsulod sa Bohol, adunay mga mingsuway ug sulod nga peke ang resulta sa RT-PCR ug ang mga bakuna card wala pa maabti ug duha ka semana sukad sa pagtusok.
Busa, nasabutan sa tanan nga ang S-Pass usa ka layer nga makatabang para mahibaw-an kon sakto ba ang mga gipasa nga mga rekisitos ug makatabang usab sa contact tracing.
Sa laing bahin, mitaho ang mga kadagkuan sa Department of Information and Communications Technology (DICT) nga ang vaxcert nga website nila gi-update na ug gitangtang na ang pangutana nga “Are you travelling abroad” ug abli na kini para sa kinatibuk-an.
Nagpahigayon usab sila karong adlawa sa re-training sa atong mga LGU Data Management Officers diin gi-update sila sa saktong pamaagi sa pag-input sa mga datos sa sistema.
Sa iyang bahin, gi-awhag sa gobernador ang mga LGUs nga padayonan ang pag-input sa mga datos sa sistema sa vaxcert aron kon moabot ang panahon nga mandatory na ang pag-implementar niini andam na ang lalawigan sa Bohol.
Dugang pa, gihangyo usab ni Gob. Yap ang atong mga mayor panghingusgan ug paspasan ang pagbakuna aron makab-ot na nato ang atong herd immunity.
Mapasalamaton usab siya sa atong mga lideres, mga frontliners, mga kapitan, ang BIATF para sa walay puas nga pagsuporta ug tabang para mahipno ug masunod sa tanan ang atong mga health protocol.
Gipahinumduman usab niya ang tanan nga dili ta mo-kumpyansa ug magpadayon gihapon nga magbinantayon kay dili pa nato mahibaw-an ang kahumanan niining pandemya.
Mitaho pud si Prov. Department of Health officer Niel John Oclarit kabahin sa kasamtangang estado sa Coronavirus disease (Covid), Hospital Data ug updates gikan sa Emergency Operations Center (EOC) samtang mitaho usab si Prov. Health Officer Dr. Cesar Tomas Lopez sa Vaccination Rollout ug Temporary Treatment Monitoring Facility (TTMF).
Gipahibaw usab mi Provincial Disaster Risk Reduction and Management Office Head Dr. Anthony Damalerio nga adunay posibleng international flight nga moabot diri sa atong lalawigan karong buwana apan nagkinahanglan pa kini ug dugang pakig-isturya sa mga kadagkuan sa Overseas Workers Welfare Administration (OWWA).
