Sinulat ni Elvira Bongosia
Giklaro sa Department of Health (DOH) ang mikatap nga infographic nga nag-ingon nga dili kinahanglan magpabakuna ang mga bata batok sa Coronavirus disease (Covid).
Matud pa sa DOH nga mahimo pa gihapon makakuha ug Covid ug ma-ospital ang mga bata tungod niini, ug mahimo usab nila kining mapasa sa ubang tawo.
Gitumbok sa ahensya nga kong nabakunahan ang mga batang may edad 12 hangtod 17 anyos, may dugang silang proteksyon batok sa grabeng Covid ug pagkamatay tungod niini, ilabi na ang mga batang adunay sakit nga mas taas ug risgo nga makuha ang grabeng Covid.
Tungod niini, gitambagan sa DOH nga magpabakuna na ang tibuok pamilya kong eskedyul na nila aron protektado ang atong mga mahal sa kinabuhi nga dili pa mahimong magpabakuna.
Subling gipahinumdom sa DOH nga ang mga Covid vaccine luwas, epektibo, ug nahatagan ug Emergency Use Authorization (EUA) sa Food and Drugs Administration (FDA).
Gipahinumdoman usab sa departamento ang publiko nga kanunay e-beripika ang mga impormasyon nga makita online sa mga lehitimong tinubdan lamang.
