Sinulat ni Elvira Bongosia
Gipa-amping sa Philippine National Police Anti-Cybercrime Group (PNP-ACG) ang publiko kalabot sa mga nikatap karon nga mga online scam.
Ilabi na karon nga nagkaduol na ang Pasko ug gipaabot nga daghan ang mamalit pinaagi sa online.
Base sa gipagawas nga pahayag sa ACG, adunay pipila ka mga nagtinda online nga wala gayoy aktuwal nga gibaligya.
Matud pa nga kasagaran sa mga gipang-post sa mga scammer mao ang mga mahalong item gikan sa mga sikat nga brand partikular na ang mga sinina ug electronic device sa baratong presyo.
Sa ingon aning modus, pagkahuman sa inisyal nga bayad, mahimong makadawat ug item ang nipalit apan peke ang ilang madawat o di kaha wala gayud madawat.
Giingong apil sa nikatap karong holiday season ang online travel scam diin may e-mail nga madawat ang usa ka indibidwal nga adunay tanyang nga “free trip” sa ubang nasod.
Matud pa nga dinhi pangayuan ang biktima ug reservation fee nga mas mahal pa sa market price.
Tambag sa ACG sa publiko, susihon una ig maayo ang mga tanyag ug dili dayon motuo sa mga promo ug ginabaligya.
Kun mabiktima niining mga modus, mahimong mosumbong sa numero 0905 414 6965 o makig-alayon sa Facebook page sa ACG.
