Sinulat ni Dave Albarado
Gitul-id sa kapitolyo ang impormasyon nga giingon nga mibabag si Gob. Arthur Yap sa mga byahe gikan Dumaguete paingon dire sa Bohol.
Dugang pa nga si Yap gusto nga ang public transport system makatabang sa relief operations.
Kini giklaro niya kay matod pa dunay sayop nga inpormasyon nga way byahe ang Ocean Jet gikan sa Dumaguete City nganhi sa Tagbilaran City kay di kuno mosugot ang gobernador.
Ang sayop nga kasayuran gipadangat ni Boy Pilongo usa kanmediaman sa Negros Oriental nga taga-Antequera ngadto kang Ven Arigo sa PRIMER sa kapitolyo.
Matod ni Arigo nga ni-chat niya si Pilongo kay gusto unta siyang mouli aron magdalag ayuda sa ilaha ug gasto na kaayo kon sa Cebu pa sya muagi aron lang makaabot dinhi.
Giingong dili tinuod ang impormasyon ug kini giklaro sa gobernador nga miingon nga wala siyay kontrol sa mga byahe susama sa Ocean Jet.
Nagkanayon ang gobernador nga ganahan siya nga adunay mga public transport alang sa pagpadala ug mga relief goods dinhi sa lalawigan.
Gikontak ni Provincial Administrator Katyrin Pioquinto ang manager sa Philippine Ports Authority (PPA)-Tagbilaran alang sa dugang kasayuranug nahinabi si James Gantalao ang manager sa
PPA-Bohol ug nasayran nga ang Maritime Industry Authority (MARINA) ug Ocean Jet lang ang makahukom sa pagbukas ug pagpabalik sa ruta gikan sa Dumaguete ngadto sa Bohol.
Ang impormasyon gikan ni Gantalao gikompirma usab ni MARINA Regional Director Marc Pascua kinsa atua na karon nadestino sa National Capital Region (NCR).
Nunot niini, adunay dugang nga pagpatin-aw usab si Provincial Disaster Risk Reduction and Management Office (PDRRMO) head Dr. Anthony Damalerio nga miingon nga kataposang higayon
nga iyang nasusi, niadtong wala pa ang bagyong Odette, nga ang local government unit sa Dumaguete Inter Agency Task Force (IATF) ang wala mohatag ug clearance sa Ocean Jet nga mobalik sa Dumaguete-Tagbilaran trip ug kini niadtong pang panahon nga taas pa ang kaso sa Coronavirus disease (Covid) sa Bohol.
Nahibaw-an nga ang hangyo sa Ocean Jet nga ibalik sa normal nga operation ang ilang Cebu-Tagbilaranug Cebu-Getafe trips ang giaksiyonan dayon sa Bohol IATF ug giingong duna na silay written approvals alang niini.
