Sinulat sa PRIMER
Giapud-apud ang 2,791 ka mga family food packs sa Bien Unido ug kapin sa 1,000 ka mga food packs sa San Miguel, tanan sa Segundo Distrito, niadtong Enero 10, 2022.
Ang ayuda gikan sa Federation of Filipino-Chinese Chamber of Commerce and Industry (FFCCCI) kansang chairman emeritus mao si Domingo Yap, amahan ni Gob. Arthur Yap, ug ang presidente mao si Henry Lim.
Nagpasalamat ang gobernador sa pag-unong sa FFCCCI sa mga biktima sa bagyong Odette.
Basi sa post ni Board Member Vierna Mae Boniel-Maglasang kinsa naa didto sa Bien Unido relief distribution, kauban sa paghatud sa tabang sila si Gob. Yap, former Board Member Jaja Jumamoy ug mga magtutudlo sa Bohol Wisdom School pinangulohan ni Lieu Hiel, Student Affairs Office head.
Nitabang ang lokal nga mga opisyal sa pagpahiluna sa mga ayuda sa mga barangay sa Poblacion, Puerto San Pedro, Nueva Estrella ug Nueva Esperanza.
Gipasalamatan sila si Mayor Rene Borenaga, Vice Mayor Monching Arcenal, Konsehal Leonardo Querubin Jr., Kap. Vanessa Avenido, Kap. Danilo Anco, Kap. Mariel Hoyvia ug Kap. Juan Hayahay.
“Ato gihapong ipadayon ang pagtinabangay alang sa kaayohan sa tanang katawhan, ilabina sa Segundo Distrito,” panawagan ni Boniel kinsa taga lungsod sa Bien Unido.
