Sinulat ni Elvira Bongosia
Nipasidaan ang Department of the Interior and Local Government (DILG) sa publiko batok sa gitawag nga “COVID-19 vaccination exemption card” nga giingong mahimong gamiton sa mga wala pa nabakunahan aron ma-exempt sa stay at home orders, mosakay sa mga pampublikong transportasyon, ug uban pang mga pribilehiyo.
“Ang publiko ay binigyan ng babala na walang ganoong bagay, bilang isang ‘vaccination exemption card’. Ito ay hindi awtorisado, inisyu, o kinikilala ng gobyerno. Sa madaling salita, peke ang mga ito,” matud pa sa gipagawas nga pahayag ni DILG Undersecretary ug tigpamaba sa buhatan JonathanMalaya.
Sa usa ka press release nga gipagawas sa DILG, miingon si Malaya nga matud pa sa mga taho nga nadawat sa departamento, ang mga “exemption card” nga giingong naggikan sa mga Facebook group ug group chat sa Rehiyon 11 ug 12 mahimong iparehistro sa mga local government units (LGUs) ug giingong giila sa mga lokal nga awtoridad isip hulip sa mga card sa pagbakuna sa Coronavirus disease (Covid).
Matud pa ni Malaya nga ang gobyerno wala bisan kanus-a nag-isyu o ilhon ang maong kard tungod kay sukwahi kini sa nasudnong programa sa pagbakuna sa gobyerno aron mabakunahan ang kadaghanan sa mga tawo aron makab-ot ang proteksyon sa populasyon.
Nagpahayag kini ug pagkadismaya nga ang pipila sa mga tawo mohimo ug mga ingon niining binuang ug disinformation aron sila ma-exempt sa pagbakuna ug mailad pa ang uban sa pagtuong mahimo silang ma-exempted sa pagbakuna.
Matud pa sa taho nga nadawat sa DILG, gipangayo sa mga tawo nga ibutang ang ilang pangalan, petsa sa pagkahimugso, address, ug mga pirma sa green vaccination exemption card nga gipanghatag sa mga FB group ug group chat, ipa-print, i-laminate, ug iparehistro ang mga card sa ilang barangay/city/municipal LGUs.
