Sinulat sa PRIMER
Gob. Art Yap malipayong mitambong sa pag-apud apud ug tabang pinansyal ngadto sa mga mag-uuma sa lungsod sa Albur niadtong Enero 31, 2022.
Mga 223 ka mga mag-uuma sa lungsod sa Albur ang nakadawat ug tag P5,000 matag usa ubos sa Rice Farmers Financial Assistance Program o RFFA diin tumong niini ang makatabang sa mga mag-uuma sa humay nga nagtikad ug 0.5 ngadto sa duha ka ektarya nga yuta sa 33 ka probinsya sa tibuok nasod.
Ang RFFA nga programa ubos kani sa balaod nga Rice Competitiveness Enhancement Fund diin usa sa nagpanday niini mao ang atong gobernador kaniadtong siya didto pa sa kongreso.
Dakong kalipay ni Yap ug mapasalamaton siya ngadto sa Department of Agriculture (DA) nga maayo ang pagka-implementar sa mga programa ubos sa maong balaod.
Gawas sa Albur, aduna usab kitay 1303 ka mga mag-uuma sa Pilar ug 1478 sa Alicia, 280 sa Bilar, 36 sa Corella, 30 sa Loay, ug 574 sa Lila ang nakadawat sa maong tabang pinansyal.
Mitambong sa maong kalihokan sila si Albur mayor Dondon Buates, Congressman Edgar Chatto, ang Regional Technical Director sa DA nga si Dir. Cirilo Namoc, Dir. Joel Elumba nga maoy Regional Executive Director, Ma. Chona Maliza ang Regional Rice Focal Person ug Dr. Larry Pamugas sa Office of the Provincial Agriculture.
