Sinulat ni Elvira Bongosia
Gipahinumdoman sa Department of Health (DOH) ang mga lokal nga kagamhanan sa pagsunod sa polisiya sa Inter Agency Task Force (IATF) kalabot sa pagpasulod sa mga dili pa bakunadong langyaw.
Gihimo sa departamento ang pahinumdom human nitugot ang pangagamhanang probinsyal sa Cebu nga dawaton ang mga ‘unvaccinated foreign travelers’ sugod sa Marso 1, 2022.
Matud pa ni DOH spokesperson Ma. Rosario Vergeire, angay gikonsulta una sa pangagamhanang probinsyal ang IATF sa wala pa nagpagawas ug polisiya.
“Let me just remind all local government ‘yung mga binabalangkas na mga panukala o protocols ng IATF’, ito ay isang mandato sa bawat isa sa LGUs na sumunod dahil kailangan yung protocols natin ipatutupad nationally so we can continuously protect our borders and we can prevent the further transmission of the disease,” pahayag pa ni Vergeire.
Sa gipagawas nga direktiba ni Cebu Gob. Gwendolyn Garcia, kinahanglan lamang nga may negative swab test result nga nigawas sa milabay nga 48 oras ang byaherong langyaw bisan unvaccinated o partially vaccinated kini.
Ipaubos sila ug balik sa swab test sa Mactan-Cebu International Airport ug ipaubos sa facility-based quarantine sa dili pa e-swab test ug balik sa ika-limang adlaw.
Samtang si DILG spokesman Jonathan Malaya namahayag nga ilang estoryahon si Gob. Garcia kalabot sa direktiba niini.
