Sinulat ni Elvira Bongosia
Gitun-an pa sa mga eksperto sa panglawas ang paghatag ug Coronavirus disease (Covid) booster shot o ikatulong tupok sa bakuna sa mga batang nag-edad 12 hangtod 17 anyos, matud pa sa Department of Health (DOH).
Matud pa ni DOH Undersecretary Maria Rosario Vergeire nga sa pagkakaron, wala pa gihapo’y igong ebidensiya nga ang mga bata sa nahisgotang age group nanginahanglan ug booster doses sa Covid vaccine.
“Well, hanggang ngayon patuloy ho ang pag-aaral at pag-uusap ng ating mga eksperto ukol dito kasi globally naman po wala pa talagang sapat na ebidensya para sa pangangailangan na bigyan ng booster ang ating 12 to 17,” matud pn ni Vergeire niadtong Sabado, Peb. 19, 2022.
“Pinag-aaralan pa rin ng mga international experts ito pong safety at saka ‘yung maibibigay na effectiveness ng bakunang ito,” dugang pa niini.
Matud pa ni Vergeire nga kun gi-aprobahan sa mga eksperto sa panglawas sa nasod ang maong plano, adunay igong pondo ang gobyerno aron makuha ang mga kinahanglanong mga bakuna.
Sa pagkakaron, naa sa 9.4 milyong bata nga may edad 12 hangtod 17 sa nasod ang nakadawat na sa unang dose sa bakuna, matud pa sa kalihim.
Adunay kapin o kulang sa 12.7 milyong mga bata edad 12 hangtod 17 sa Pilipinas.
Sa pagkakaron, ang mga bakunang Pfizer-BioNTech ug Moderna Covid lamang ang itupok sa mga bata.
Kapin 300,000 ka mga bata usab nga may edad lima hangtod 11 ang nakadawat sa ilang unang dose sa Covid vaccine.
