Atty. Trisha Chatto

Si Atty. Trisha Chatto, ang anak ni Balilihan mayor Pureza Chatto ug ni Kong. Edgar Chatto, mipost sa iyang tubag sa mga pagsaway nga gisabwag ngadto sa ilang pundok sa Balilihan Padayon Bol-anon pinaagi sa social media sa ilang mga kaatbang sa pulitika kabahin sa tubig sa lungsod sa Balilihan.

Si Atty. Trisha maoy kandidato sa pagka bise mayor sa Balilihan ubos sa Pundok Padayon Bol-anon.

Iyang gitubag ang mga pasangil, sa usa ka post nga nigawas niadtong Mar. 16, 2022.

Gipahimakak ni Atty. Trisha nga walay gipirmahan nga Memorandum of Agreement (MOA) ang Balilihan ug ang Bohol Water Utilities (BWUI) ug ang anaa usa ka proposal pa lamang.

Naa bay Memorandum of Agreement ang Balilihan og ang BWUI? WALA. Proposal pa lang,” matud pa ni Atty. Trisha.

Midugang pa sya sa pag-ingon:  “Naa bay gibayad ang Balilihan sa BWUI? WALA. ZERO. Naa man moy kauban nga opisyal, ipasubay ang budget kung asa dapit gabayad ang Balilihan sa BWUI. Abtan silag siyam siyam wala gihapon silay makit-an bisag piso.”

Dugang asoy ni Atty. Trisha nga usa ka pagtuon lang ang gihimo sa barangay Maslog.

“Unsa man nang gibuhat sa Maslog? Water Potability test o pagtuon pa lang. Requirement ni sa National Water Resources Board [NWRB] para makakuha ug Water Permit ang Balilihan,” sumala pa kang Atty. Trisha.

Dugang pa sa nag-inusarang anak sa magtiayong Chatto, “Kung mahuman na ang water potability test, makuha ba sa BWUI ang tubig sa Balilihan? DILI GIHAPON kay kung ihatag sa NWRB ang pagtugot sa paggamit sa tubig, ihatag kini sa Munisipyo. Dili sa BWUI. “

Gitin-aw ni Atty. Chatto ang isyu kabahin sa giingong pagpamaligya sa Balilihan ug tubig ngadto sa laing mga lungsod.

“Gibaligya na ba ang tubig sa Balilihan sa ubang lungsod? WALA,” asoy ni Atty. Trisha.

Dugang pa ni Atty. Trisha, “KUNG naay extraction fee nga 80 centavos, alkansi ba ang Balilihan? DILI. Kung naay 80 centavos, naay extra income ang lungsod. Kung wala, walay extra income ang lungsod. Mao ra na.”

Gitubag usab ni Atty. Trisha ang laing isyu kabahin sa extraction fee.

“Naa bay hing-offer sa Balilihan nga 2 pesos ang ibayad imbes nga .80 centavos? WALA. Kung naa silay nahibaw-an nga investor nga willing mubayad ana, pwede nila ipahibalo sa lungsod. Kung naay investor nga mas nindot og offer para sa atong lungsod, mas maayo. Ang pinaka-importante lang, muagi ta sa saktong proseso kay dili mahimo i-harab harab ang atong panubig,” pagpasabot ni Atty. Trisha.

Gitumbok sa batan-ong abogada nga dili tanan ang nakasabot sa isyu kalabot sa tubig.

“Kasabot ba ang tanan? WALA. Kay naay uban nga di lang jud gustong musabot,” sumala pa sa abogada.

Tungod niini, gisaway sa batan-ong abogada ang nag sige ug post sa Facebook kabahin sa isyu nga gilabay sa pundok diin sya na apil nga mao ang Padayon Bol-anon.

“Kanang gakalingaw ug post [sa] Facebook, hing-atubang ba ni mayor sumala sa iyang giingon nga willing siya makigstorya ni mayor inubanan  ug media? WALA! Kutob ra siya tagawtaw sa Facebook. Gahuwat ra si Mayor niya,” panghinapos nga pamahayag ni Atty. Trisha.