Gikan sa Philippine Information Agency
Adunay paglaum sa mga biktima sa bagyong Odette kinsa ang mga balay nadaot human migawas ang balita nga adunay laraw ang National Housing Authority (NHA).
Hinoon, mihatag na ug hinabang ang NHA alang sa mga Bol-anon nga naguba ang balay tungod sa bagyo pero kini kulang pa kay 27 ka lungsod ang natagaan ug hinabang.
Matud pa ni NHA-7 Bohol District manager Grace V. Solis nga gitunol na nila ang hinabang alang sa mga biktima nga anaa sa 27 ka mga lungsod nga partially o totally damaged sa usa ka yanong seremonyas kauban si Gob. Arthur Yap.
Ang kagamhanang probinsyal maoy magdumala ug mag apod-apod sa hinabang gikan sa NHA ngadto sa mga angayan nga tagaan.
Ang NHA mipatin-aw nga gebasi ang pasiunang hinabang sa lista sa gihatag sa local government unit hinoon dili tanang lungsod malapuson nga nakahatag ug listahan sa mga naguba ang panimalay.
Naay naulahi ug paghatag ug lista ug mikabat lang sa 27 ka mga lungsod ang nakahatag ug lista ngadto sa NHA.
Ang NHA usa ka myembro sa National Disaster and Risk Reduction Management Council’s Shelter Cluster, nga ang pasiunang P55 milyon nga hinabang pinasikad kini sa nadawat na lista sa maong ahensya.
Sa bana-bana, mukabat sa 15,002 ka mga balay sa unang distrito ang naguba gumikan sa bagyo.
Sa segundo distrito, 57,268 ka pamimalay ang nadaot ug 12,534 ka pinuy-an sa tersero distrito ang nagaguba.
Sa bana-bana sa NHA, moabot sa 84,808 ka balay ang hingpit nga naguba tungod sa bagyo.
Sumala pa sa NHA, mga 213,832 ka panimalay ang partially damaged.
Tungod niini, gisugyot sa NHA sa buhatan sa presidente sa nasud nga magpagawas ug dugang pondo alang sa mga katawhan nga naguba ang balay ug wala pa mahatagan ug hinabang.
Ug mayunan sa presidente, makadawat ug P30,000 nga hinabang ang mga hingpit nga naguba ang balay ug P10,000 ang mga balay kay partially damaged.
