Sinulat ni Rey Anthony Chiu
Lima sa napulo ka mga kalungsuran nga naa sa top ten nga hing-grabehan sa paglampurnas sa bagyong Odette dinhi sa Bohol, parehas nga anaa sa ikaduhang distrito sa Bohol.
Gani sa ranking nga gihimo sa Shelter Cluster sa Provincial Disaster and Risk Reduction Management Council (PDRRMC), sa partial nga taho nga nakuha niini gikan sa kalungsuran, ang mga lungsod sa Ubay, Talibon, Inabanga, Getafe ug Trinidad ang nasulod sa top 10 sa ikaduhang distrito, samtang ang lungsod sa Carmen lamang ang sa Ikatulong Distrito nga nasulod sa listahan sa 10 ka labing apektado nga lungsod sa Bohol.
Ang nasulod sa 10 ka kalungsuran nga nakasinati ug grabe nga kadaut bisan pa sa kakuwang sa mga taho nga nagsukad didto, mao ang Ubay, Talibon, Tubigon, Carmen, Inabanga, Loon, Trinidad, Tagbilaran City, Calape ug Getafe.
Sa unang distrito, nasulod ang kalungsuran sa Calape, Loon, Tagbilaran City ug Tubigon sa mingtaho ngadto sa PDRRM sa ilang mga kabalayan ug kabtangan nga nanga-butalid sa bagyo.
Agi ug tabang usab, ang National Housing Authority, mingtunol na ngadto sa governador sa Bohol sa P55 milyones nga abag sa mga nawad-an ug balay sa katalagman.
Gawas sa NHA, ang Department of Budget and Management ug ang Department of Social Welfare and Development, minggamit usab sa ilang mga pundo aron makatabang sa mga nawad-ag panimalay.
Ang lalawigan sa Bohol usab gikataho nga nanghatag ug ayuda, samtang may mga kalungsuran nga nagpagawas sa ilang kamaayo sa pagdumala dihang nakapahigayon ug malungtarong sistema sa tinabangay aron makabalay.
Sa kasamtangan, nangayo pa ang NHA ug dugang pundo gikan sa Office of the President aron ikadugang sa unang hinabang nga gitanyag sa NHA, segun sa pahayag ni Grace Solis, hepe sa NHA Bohol.
