Sinulat ni Rey Anthony Chiu
Alang sa mga Bol-anon nga buot moparehistro sa Pen and Paper Test (PPT) sa Civil Service Commission Career Service Examination (CSC-CSE) apan napugngan sa online nga pagparehistro tungod sa pagkawala sa korente ug internet connection, ania’y maayong balita.
Inay magsugod ang online nga pagparehistro sa Abril 12, 2022, iuswag na kini sa Abril 18 ngadto sa Abril 28, ug sama sa gihapon, first come first served ang pamaagi.
Gawas sa petsa sa pag-akses sa online system nga nausab, epektibo pa gihapon ang mga panudlo kon unsay buhaton sa pagparehistro online sumala sa una na nga gipagawas nga kasayuran.
Matud sa information officer sa CSC Bohol Field Office Liezl del Rosario, mismo ang mga tagdumala sa CSC regional Office 7 ang misabut sa sitwasyon nga ang kinatibuk-ang Bohol nga kasamtangan nga nakasinati sa wala ma schedule nga pagkapawong sa suga nakasabut nga kini magpapas sa kahigayunan sa mga aplikante sa pag-akses sa online system sa pagrehistro tungod sa pagkawala sa korente ug internet connections.
Niini, alang sa mofile sa application alang sa Tagbilaran City Testing Center, kini gisibug na ngadto sa Abril 18-28, 2022 o hangtud mapuno ang bakante nga slots, hain man niini ang mauna.
Sa maka usa pa, gipahinumdon gihapon ni del Rosario nga ang CSC Bohol dili gihapon manawat sa walk in applications aron maseguro ang health ug safety sa mga tawo sa buhatan ug sa mga modagsang aron pagduso sa ilang aplikasyon.
