Sinulat ni Elvira Bongosia
Giklaro sa Philippine Health Insurance Corp. (PhilHealth) nga gawas sa mas taas nga kontribusyin nga ikaltas sa sweldo sa mga empleyado sugod Hunyo 2022, kinahanglan usab magbayad ug kontibusyon sa PhilHealth ug 1 porsyentong additional premium sugod Enero hangtod Mayo tungod kay matud pa, retroactive ang bag-ong premium rate.
Sa Advisory No. 2022-0010, miingon ang PhilHealth nga ang mga miyembro ug mga employer nga nakabayad na sa ilang 3 porsyentong kontribusyon sa mga buwan sa wala pa niabot ang gitakdang premium rate hike gikan 3 hangtod upat nga porsyento sugod sa sunod nga buwan kinahanglan mu-generate ug tukmang Statement of Premium Account aron mabayran ang 1% differential payments/remittances hangtud sa Disyembre 31, 2022.
Gipasabot sa buhatan nga ang premium rate nga 4 porsyento alang sa 2022 “retroactively effective” sugod Enero ning tuig bisan ug ang bag-ong contribution rate epektibo lamang sa Hunyo 2022.
Ang pagsaka sa premium agi ug pagsunod sa Universal Health Care law nga nagmandato nga ang premium rate mosaka ug increments nga 0.5% matag tuig ug magsugod gikan 3% sa 2020 hangtod moabot kini ug 5%.
